پاکستانی بحریہ کا مقامی طور پر تیارکردہ اینٹی شپ بیلسٹک میزائل کا کامیاب تجربہ

پاکستانی بحریہ نے منگل کو بحری جہاز سے لانچ ہونے والے اینٹی شپ بیلسٹک میزائل کا ٹیسٹ کیا۔

مسلح افواج کے شعبہ تعلقات عامہ آئی ایس پی آر کی جانب سے جاری بیان کے مطابق یہ ہتھیار نہ صرف سمندری بلکہ زمینی اہداف کو بھی انتہائی درست طریقے کے ساتھ نشانہ بنانے کی صلاحیت رکھتا ہے۔

بیان کے مطابق میزائل سسٹم جدید ترین رہنمائی اور جدید حرکی خصوصیات سے لیس ہے۔

اس ٹیسٹ کا مشاہدہ پاکستانی بحریہ کے سربراہ ایڈمرل نوید اشرف، سینیئر سائنس دانوں اور انجینیئروں نے کیا۔

بیان میں کہا گیا ہے کہ کامیاب پرواز کا یہ تجربہ پاکستان کی ٹیکنالوجیکل مہارت اور پاکستانی بحریہ کے قومی مفادات کے تحفظ کے لیے غیرمتزلزل عزم کا ثبوت ہے۔

’صدر پاکستان، وزیراعظم، فیلڈ مارشل، چیئرمین جوائنٹ چیفس آف سٹاف کمیٹی اور سروسز چیفز نے شریک یونٹس اور سائنس دانوں کو اس کامیابی پر مبارک باد دی ہے۔‘