مسجد الحرام کے بیرونی صحنوں میں مفت لاکرز کی سہولت 24 گھنٹے دستیاب

ادارہ امور حرمین شریفین کی انتظامیہ کی جانب سے زائرین کو فراہم کی جانے والی خدمات میں مفت لاکر سسٹم کی سہولت کا اضافہ کیا گیا ہے۔

سعودی خبررساں ایجنسی ’ایس پی اے‘ کے مطابق مسجد الحرام کے بیرونی صحنوں میں انتظامیہ نے جو لاکرز مہیا کیے ہیں وہ 24 گھنٹے دستیاب ہیں۔

انتظامیہ نے ابتدائی طور پر مسجد الحرام کے بیرونی صحنوں میں تین مقامات پر لاکرز کی سہولت فراہم کی ہے۔

مغربی جانب کے صحن میں وضوخانہ نمبر6 جبکہ دوسرا لاکر شارع اجیاد میں وضوخانہ نمبر2 اور تیسرا لاکر مشرقی جانب مکہ مکرمہ کتب خانے کے ساتھ قائم کیا گیا ہے۔

حرمین انتظامیہ کا کہنا ہے’ لاکرز میں سامان رکھنے کی کوئی فیس نہیں، یہ سہولت زائرین کے لیے مفت فراہم کی جارہی ہے۔‘

واضح رہے ادارہ امورحرمین شریفین کی جانب سے زائرین حرمین کے لیے مختلف نوعیت کی سہولیات فراہم کی جاتی ہیں تاکہ زائرین آرام سے اپنا زیادہ سے زیادہ وقت عبادت میں گزار سکیں۔

مفت لاکرسسٹم کی سہولت بھی اسی اقدام کے سلسلے میں شروع کی گئی ہے۔