عمرہ زائرین کو خدمات فراہم کرنے والی کمپنیوں کے لائسنس کےلیے سات شرائط

سعودی وزارتِ حج  نے عمرہ زائرین کو خدمات فراہم کرنے والی کمپنیوں کے لائسنس کےلیے سات شرائط تجویز کی ہیں۔

اخبار 24 کے مطابق وزارتِ حج کی جانب سے سروے پلیٹ فارم پر لائسنس کے لیے جو شرائط تجویز کی گئی ہیں ان میں کمپنی سوفیصد سعودی شہری کی ملکیت میں رجسٹرڈ ہو۔ کمپنی کا سرمایہ پانچ لاکھ ریال سے کم نہ ہو۔

لائسنس کے لیے دی جانے والی درخواست کے ساتھ غیرمشروط  بینک گارنٹی دی جائے جس کی تصدیق سعودی مرکزی بینک کی جانب سے کی گئی ہو۔

کمپنی کی جانب سے تحریری طورپر آپریشنل فیلڈ اور پلان کے بارے میں تفصیلات فراہم کی جائیں۔ ہر ادارے کے بارے میں تفصیلات پیش کی جائیں جن میں بجٹ کی صلاحیت اور افرادی قوت وغیرہ شامل ہے۔

ہر ادارہ اپنے مالی معاملات کو پورا کرنے کی صلاحیت کا حامل ہو۔ عہدوں کی وضاحت کی جائے عہدیداروں کی تبدیلی کی صورت میں وزارت کو تحریری طورپر مطلع کیا جائے۔

کسی بھی کمپنی یا ادارے کی جانب سے منظور شدہ لائسنسنگ ضوابط کی خلاف ورزی کرتا ہے تو وزارت کو حق ہے کہ وہ لائسنس کو معطل کردے اس صورت میں 30 دن کے اندر خلاف ورزی کو درست کرنے کی مہلت دی جائے گی۔

 تجاویز میں مزید کہا گیا کہ’ کمپنی یا ادارے کے مالک کے فوت ہونے کی صورت میں لائسنس کینسل کردیا جائے گا۔‘

علاوہ ازیں اگر کمپنی یا ادارہ ڈیفالٹ کرجائے تو اس صورت میں کمپنی کے ڈائریکٹر کی جانب سے وزارت کو تحریری طور پر مطلع کرنا ہوگا۔

شرائط میں مزید کہا گیا کہ ’اگر کسی کمپنی کے مالک یا ذمہ دار کی جانب سے لائسنس کو کسی دوسرے کے نام منتقل  کیا لیز پر دینا ثابت ہو جائے اس صورت میں وزیر حج کو یہ اختیار ہوگا کہ وہ  لائسنس کو منسوخ کردیں۔‘

ایک برس تک جاری شدہ لائسنس پر کوئی عمل نہ کیے جانے کی صورت میں اسے کینسل کردیا جائے گا تاہم اس دوران اگر کمپنی کے مالک کی جانب سے مناسب وجہ پیش کیے جانے پر 6 ماہ کی مہلت دی جائے گی مہلت ختم ہونے کی صورت میں لائسنس مستقل بنیادوں پر معطل کردیا جائے گا۔