اگر قبضہ ختم ہو گیا تو ہتھیار فلسطینی اتھارٹی کے حوالے کر دیں گے: حماس

حماس نے کہا ہے کہ وہ اسرائیلی فوج کا قبضہ ختم ہونے کی صورت میں غزہ میں اپنے ہتھیار اُس فلسطینی اتھارٹی کے حوالے کرنے کو تیار ہے جو اس علاقے کا انتظام سنبھالے۔

فرانسیسی خبر رساں ایجنسی اے ایف پی کے مطابق حماس کی مذاکراتی ٹیم کے سربراہ خلیل الحیہ نے اپنے بیان میں کہا کہ ’ہمارے ہتھیار قبضے اور جارحیت کی وجہ سے ہیں۔ اگر قبضہ ختم ہو جائے تو یہ ہتھیار ریاست کے اختیار میں دے دیے جائیں گے۔‘

ان کے دفتر نے وضاحت کی کہ وہ ایک آزاد اور مکمل خودمختار فلسطینی ریاست کی بات کر رہے تھے۔

خلیل الحیہ نے مزید کہا کہ ’ہم اقوامِ متحدہ کی فورسز کی تعیناتی کو قبول کرتے ہیں جو سرحدوں کی نگرانی کریں اور جنگ بندی پر عمل کروائیں‘ تاہم انہوں نے ایسی بین الاقوامی فورس کو مسترد کیا جس کا مقصد حماس کو غیر مسلح کرنا ہو۔