سینکڑوں پروازوں کی منسوخی، ’انڈیگو‘ نے مسافروں کو 610 کروڑ انڈین روپے ریفنڈ کر دیے

انڈیا کی سب سے بڑی ائیرلائن ’انڈیگو‘ نے حالیہ آپریشنل بحران کے بعد مسافروں کو چھ ارب 10 کروڑ انڈین روپے کے ریفنڈز جاری کر دیے ہیں جبکہ پروازوں کی وقت کی پابندی میں بھی واضح بہتری سامنے آئی ہے۔

این ڈی ٹی وی کے مطابق ائیرلائن نے بتایا ہے کہ ’اتوار کو 75 فیصد پروازیں وقت پر روانہ ہوئیں، جو سینچر کو صرف 30 فیصد تھیں۔‘

یاد رہے کہ ’انڈیگو‘ کا شمار اندرون ملک پروازیں چلانے والی سب سے بڑی ایئرلائنز میں ہوتا ہے تاہم حالیہ دنوں میں آپریشنل بحران کی وجہ سے اس کی سینکڑوں پروازیں منسوخ ہوئیں تھیں جس کی وجہ سے مسافر کئی روز تک ایئرپورٹس میں پھنسے رہے تھے۔

’انڈیگو‘ کے مطابق ائیرلائن 1650 سے زائد پروازیں آپریٹ کرنے کی راہ پر گامزن ہے جو سنیچر کو 1500 تھیں۔ ائیرلائن کے 138 میں سے 137 روٹس مکمل طور پر فعال ہو چکے ہیں۔

ائیرلائن نے اعلان کیا ہے کہ 15 دسمبر تک ہونے والی بکنگ کے لیے پرواز منسوخ کرنے یا تاریخ بدلنے کی فیس نہیں لی جائے گی جبکہ ریفنڈ اور سامان واپس دینے کا کام بھی تیزی سے جاری ہے۔

کمپنی نے کہا ہے کہ وہ دن رات کام کر رہی ہے اور مسافروں سے تعاون کی اپیل ہے۔

کمپنی کے مطابق وہ اب تک مسافروں کو چھ ارب 10 کروڑ انڈین روپے سے زائد ریفنڈ کر چکی ہے جبکہ تین ہزار بیگ بھی ان کے مالکان تک پہنچائے گئے ہیں۔

اس سے قبل انڈیا کی وزارتِ سول ایویشن نے کہا تھا کہ ’’انڈیگو‘ کے مسئلے کو حل کرنے کے لیے فوری اقدامات کیے ہیں تاکہ مسافروں کو زیادہ پریشانی نہ ہو۔‘

حکام کے مطابق ملک میں باقی تمام ائیرلائنز معمول کے مطابق کام کر رہی ہیں اور ’انڈیگو‘ کی کارکردگی بھی بہتر ہوتی جا رہی ہے۔

وزارت نے ’انڈیگو‘ کو حکم دیا تھا کہ وہ تمام متاثرہ مسافروں کے ریفنڈ اتوار کی رات آٹھ بجے تک مکمل کرے اور مسافروں کا گمشدہ سامان واپس کرے۔