امارات کے وزیرِ رواداری شیخ نہیان بن مبارک کی خیرپور آمد، محسن نقوی نے استقبال کیا
متحدہ عرب امارات کے وزیرِ رواداری و بقائے باہمی شیخ نہیان بن مبارک النہیان خیرپور پہنچ گئے، جہاں وفاقی وزیرِ داخلہ محسن نقوی نے ان کا استقبال کیا۔
وزارت داخلہ کی جانب سے جاری بیان کے مطابق اس موقع پر دونوں رہنماؤں نے متحدہ عرب امارات کے قومی دن کی مناسبت سے مل کر کیک کاٹا۔
وفاقی وزیرِ داخلہ محسن نقوی نے امارات کے قومی دن پر شیخ نہیان بن مبارک النہیان کو دلی مبارکباد پیش کی۔
بعد ازاں محسن نقوی اور شیخ نہیان بن مبارک النہیان کے درمیان ملاقات ہوئی، جس میں پاکستان اور متحدہ عرب امارات کے درمیان دوطرفہ تعاون کو مزید فروغ دینے، باہمی دلچسپی کے امور اور مختلف شعبوں میں مشترکہ اقدامات پر تفصیلی تبادلہ خیال کیا گیا۔
بیان کے مطابق شیخ نہیان بن مبارک النہیان نے پاکستان آمد پر خوشی کا اظہار کرتے ہوئے کہا کہ ’میرے بھائی کی جانب سے پرتپاک خیرمقدم پر دلی خوشی ہوئی۔‘
اس موقع پر گفتگو کرتے ہوئے وفاقی وزیرِ داخلہ محسن نقوی نے کہا کہ پاکستان اور متحدہ عرب امارات کے درمیان بہترین برادرانہ تعلقات باہمی اعتماد، احترام اور دیرینہ رفاقت پر قائم ہیں، اور دونوں ممالک ان تعلقات کو مزید مضبوط بنانے کے لیے پرعزم ہیں۔
تقریب میں متحدہ عرب امارات کے سفیر سالم محمد الزابی، وزیرِ مملکت عبدالرحمن کانجو اور دیگر معزز شخصیات بھی موجود تھیں۔
