مقبول گیم ’کال آف ڈیوٹی‘ کے شریک خالق وِنس زیمپیلا کار حادثے میں جان سے گئے

مقبول ویڈیو گیم فرنچائز ’کال آف ڈیوٹی‘ کے شریک خالق وِنس زیمپیلا اتوار کے روز لاس اینجلس کے قریب کار حادثے میں جان سے گئے۔

این بی سی لاس اینجلس کے مطابق 55 سالہ وِنس زیمپیلا فراری سپورٹس کار میں سوار تھے جب جنوبی کیلیفورنیا کی اینجلس کرسٹ ہائی وے پر ان کی کار کو حادثہ پیش آیا۔ 

وِنس زیمپیلا ویڈیو گیم انڈسٹری کی ایک نمایاں اور معتبر شخصیت تھے اور ریسپان انٹرٹینمنٹ کے سربراہ تھے۔ وہ اس سے قبل انفینٹی وارڈ کے سی ای او بھی رہ چکے تھے، جو مشہور 'کال آف ڈیوٹی' فرنچائز کا خالق سٹوڈیو ہے۔

کار حادثہ دوپہر تقریباً 12 بجکر 45 منٹ پر لاس اینجلس کے شمال میں سان گیبریل پہاڑوں میں واقع خوبصورت مگر پیچیدہ سڑک پر پیش آیا۔

کیلیفورنیا ہائی وے پٹرول (سی ایچ پی) کے مطابق جنوب کی سمت جانے والی فیراری ایک سرنگ سے نکلتے ہی بے قابو ہو کر کنکریٹ کی رکاوٹ سے ٹکرائی۔

سی ایچ پی کے مطابق گاڑی میں آگ لگنے کے بعد ڈرائیور وِنس زیمپیلا اندر ہی پھنس گئے اور موقع پر ہی دم توڑ گئے، جبکہ ساتھ موجود مسافر بعد ازاں ہسپتال میں جانبر نہ ہو سکا۔ حکام کے مطابق مسافر کی شناخت فوری طور پر سامنے نہیں آ سکی۔

حادثے کی وجوہات تاحال واضح نہیں ہو سکیں۔ ایک عینی شاہد کی جانب سے فراہم کی گئی ویڈیو میں دیکھا جا سکتا ہے کہ 2026 ماڈل فیراری 296 جی ٹی ایس سرنگ سے نکلتے ہی تیز رفتاری سے کنکریٹ بیریئر سے ٹکرا جاتی ہے۔

یہ لگژری، مڈ انجن سپورٹس کار ہائبرڈ ٹوئن ٹربو وی-6 انجن سے لیس ہے، جو 819 سے زائد ہارس پاور پیدا کرنے کی صلاحیت رکھتی ہے۔

وِنس زیمپیلا نے 2010 میں چیٹس ورتھ میں قائم ریسپان انٹرٹینمنٹ کی بنیاد رکھی۔ اس سٹوڈیو کو 2017 میں ویڈیو گیم کمپنی ای اے نے خرید لیا تھا۔ ریسپان انٹرٹینمنٹ ’ٹائٹن فال‘، ’ٹائٹن فال 2‘، ’ایپکس لیجنڈز‘ اور ’سٹار وارز جیڈی: فالن آرڈر‘ جیسے مقبول گیمز کے لیے جانا جاتا ہے۔

واشنگٹن پوسٹ کے ویڈیو گیم ناقد جین پارک، جن کی زیمپیلا سے ملاقات ہو چکی تھی، نے کہا ’وہ کہانیوں اور تجربات کو اس انداز میں تخلیق کرنا جانتے تھے جو انسان کے جذبات کی گہرائیوں کو چھو لیتے تھے، چاہے وہ خوف ہو، دہشت ہو یا ہیروازم۔ وہ یہ سب اپنے گیم ڈیزائن کے ذریعے بخوبی پیش کرتے تھے۔‘

جین پارک نے کہا ’وہ نہایت عاجز انسان تھے۔ انہیں اس بات کا پورا شعور تھا کہ ان کے کام نے لوگوں پر کیا اثر ڈالا، اور انہوں نے کبھی اسے معمولی نہیں سمجھا۔‘

زیمپیلا ای اے کے اس سٹوڈیو کی قیادت بھی کر رہے تھے جو پلیا وسٹا میں قائم ہے اور ’بیٹل فیلڈ‘ ویڈیو گیم فرنچائز پر کام کر رہا تھا۔

ای اے نے ایک بیان میں کہا کہ ویڈیو گیمز کی دنیا پر وِنس زیمپیلا کے اثرات ’گہرے اور دور رس‘ تھے۔

بیان میں کہا گیا ’یہ ایک ناقابلِ تصور نقصان ہے۔ ہماری ہمدردیاں وِنس کے خاندان، ان کے عزیزوں اور ان تمام عزیزوں کے ساتھ ہیں جو ان کے کام سے متاثر ہوئے۔ ویڈیو گیم انڈسٹری پر وِنس کا اثر گہرا اور دیرپا تھا۔ ایک دوست، ساتھی، رہنما اور تخلیقی وژن رکھنے والے فرد کے طور پر، ان کے کام نے جدید انٹرایکٹیو انٹرٹینمنٹ کی شکل بدل دی اور دنیا بھر میں لاکھوں گیمرز اور ڈویلپرز کو متاثر کیا۔ ان کی وراثت آنے والی نسلوں تک گیمز کی تخلیق اور کھلاڑیوں کے باہمی تعلق کے انداز کو متاثر کرتی رہے گی۔‘