جب بات ایک ملک سے دوسرے ملک بغیر کسی پابندی کے سفر کرنے اور سرحدوں پر طویل قطاروں سے بچنے کی ہو تو دنیا میں چند ایسے پاسپورٹس ہیں جو دیگر کے مقابلے میں کہیں زیادہ اثر و رسوخ رکھتے ہیں۔
سی این این کے مطابق سال 2026 کے لیے ’ہینلے پاسپورٹ انڈیکس‘ کی تازہ ترین رپورٹ نے عالمی سفر اور سفارتی طاقت کے نئے پیمانے متعارف کروا دیے ہیں جہاں ایشیائی ممالک کی حکمرانی برقرار ہے جبکہ مغربی طاقتیں اپنی ساکھ بچانے کی تگ و دو میں مصروف دکھائی دیتی ہیں۔
’ہینلے پاسپورٹ انڈیکس‘ کے مطابق دنیا کا طاقتور ترین پاسپورٹ سنگاپور کا ہے جس کے شہری دنیا کے 227 میں سے 192 مقامات پر بغیر پیشگی ویزا کے جا سکتے ہیں۔
مزید پڑھیں
اس فہرست میں دوسرے نمبر پر جاپان اور جنوبی کوریا مشترکہ طور پر براجمان ہیں جنہیں 188 ممالک تک رسائی حاصل ہے۔
لندن میں قائم ہینلے اینڈ پارٹنرز کی یہ رپورٹ انٹرنیشنل ایئر ٹرانسپورٹ ایسوسی ایشن کے خصوصی ڈیٹا پر مبنی ہے۔
یورپی ممالک بھی اس دوڑ میں پیچھے نہیں ہیں۔ فہرست میں تیسرے نمبر پر ڈنمارک، لکسمبرگ، سپین، سویڈن اور سوئٹزرلینڈ موجود ہیں جن کے پاسپورٹ پر 186 ممالک کے دروازے کھلے ہیں۔
چوتھی پوزیشن بھی مکمل طور پر یورپی ممالک کے قبضے میں ہے جہاں آسٹریا، جرمنی، فرانس اور اٹلی جیسے 10 ممالک 185 کے سکور کے ساتھ موجود ہیں۔
تاہم رواں برس سب سے زیادہ توجہ متحدہ عرب امارات (یو اے ای) نے حاصل کی ہے۔
انڈیکس کی 20 سالہ تاریخ میں یو اے ای نے سب سے شاندار کارکردگی دکھائی ہے جس نے سنہ 2006 سے اب تک اپنے ویزا فری ممالک میں 149 کا اضافہ کیا اور مجموعی رینکنگ میں 57 درجے اوپر آ کر پانچویں پوزیشن حاصل کر لی ہے۔
رپورٹ کے مطابق یہ کامیابی یو اے ای کی مسلسل سفارتی کوششوں اور ویزا پالیسیوں میں نرمی کا نتیجہ ہے۔
دوسری جانب برطانیہ اور امریکہ کے لیے یہ سال خوش آئند ثابت نہیں ہوا۔
برطانیہ اس وقت ساتویں نمبر پر ہے اور گزشتہ ایک برس کے دوران اس نے آٹھ ممالک تک ویزا فری رسائی کھو دی ہے۔
امریکہ جو 2025 کے اواخر میں پہلی بار ٹاپ 10 سے باہر ہو گیا تھا، اب بمشکل 10ویں نمبر پر واپس آیا ہے لیکن ماہرین کا کہنا ہے کہ زیادہ خوشی کا وقت ابھی نہیں آیا کیونکہ امریکہ گزشتہ 12 ماہ میں سات مقامات تک رسائی کھو چکا ہے اور گزشتہ دو دہائیوں میں سب سے زیادہ تنزلی کا شکار ہونے والے ممالک میں تیسرے نمبر پر ہے۔
ویانا کے انسٹی ٹیوٹ فار ہیومن سائنسز کے ریکٹر میشا گلینی کا کہنا ہے کہ پاسپورٹ کی طاقت دراصل سیاسی استحکام اور سفارتی اعتبار کی آئینہ دار ہوتی ہے۔
ان کے بقول امریکہ اور برطانیہ جیسے ممالک کی سفری آزادی میں کمی کسی تکنیکی خرابی کا نتیجہ نہیں بلکہ عالمی جیو پولیٹیکل بساط پر آنے والی تبدیلیوں کا اشارہ ہے۔
اس انڈیکس کا افسوس ناک پہلو وہ وسیع خلیج ہے جو دنیا کے امیر اور غریب ممالک کے درمیان موجود ہے۔ جہاں سنگاپور ٹاپ پر ہے وہیں افغانستان 101 ویں نمبر کے ساتھ فہرست میں سب سے نیچے ہے جس کے شہری صرف 24 ممالک کا ویزا فری سفر کر سکتے ہیں۔
شام اور عراق کی صورت حال بھی کچھ مختلف نہیں ہے۔ ہینلے اینڈ پارٹنرز کے چیئرمین کرسچن کیلن کا کہنا ہے کہ پاسپورٹ کا استحقاق اب معاشی شرکت اور سکیورٹی کے حصول میں فیصلہ کن کردار ادا کر رہا ہے۔
رپورٹ میں یہ بھی انکشاف کیا گیا ہے کہ اب امریکی شہری بڑی تعداد میں دُہری شہریت کے حصول کے لیے کوشاں ہیں تاکہ وہ اپنی نقل و حرکت کو یقینی بنا سکیں۔
تاہم کئی یورپی ممالک نے اب اپنی شہریت کے قوانین سخت کر دیے ہیں اور امریکہ میں بھی ایسی قانون سازی کی تجاویز سامنے آ رہی ہیں جو دُہری شہریت پر پابندی لگا سکتی ہیں۔
یہ تمام صورتحال ظاہر کرتی ہے کہ 2026 میں پاسپورٹ محض ایک سفری کتابچہ نہیں بلکہ عالمی سطح پر آپ کی حیثیت اور مواقع کا پاسبان بن چکا ہے۔
سنہ 2026 کے طاقتور ترین پاسپورٹس کی فہرست
1۔ سنگاپور (192 ممالک)
2۔ جاپان، جنوبی کوریا (188)
3۔ ڈنمارک، لکسمبرگ، سپین، سویڈن، سوئٹزرلینڈ (186)
4۔ آسٹریا، بیلجیم، فن لینڈ، فرانس، جرمنی، یونان، آئرلینڈ، اٹلی، نیدرلینڈز، ناروے (185)
5۔ ہنگری، پرتگال، سلوواکیہ، سلووینیا، متحدہ عرب امارات (184)
6۔ کروشیا، چیک جمہوریہ، ایسٹونیا، مالٹا، نیوزی لینڈ، پولینڈ (183)
7۔ آسٹریلیا، لٹویا، لیختنشٹائن، برطانیہ (182)
8۔ کینیڈا، آئس لینڈ، لتھوانیا (181)
9۔ ملائیشیا (180)
10۔ امریکہ (179)
پاکستان سے نیچے صرف عراق، شام اور افغانستان
ہینلے پاسپورٹ انڈیکس رپورٹ کے مطابق پاکستان کا شمار ایک بار پھر دنیا کے کمزور ترین پاسپورٹس میں ہوا ہے۔ اس فہرست میں پاکستان کو 98ویں نمبر پر رکھا گیا ہے جو کہ نیچے سے چوتھا درجہ بنتا ہے۔
پاکستانی پاسپورٹ کے حامل شہری اس وقت دنیا کے 31 ممالک میں ویزا کے بغیر یا ’ویزہ آن ارائیول‘ کی سہولت کے ساتھ سفر کر سکتے ہیں۔
رپورٹ میں واضح کیا گیا ہے کہ پاکستان سے نیچے صرف عراق (103واں نمبر)، شام (104واں نمبر) اور افغانستان (105واں نمبر) موجود ہیں۔
