’سعودی فرانسیسی تعاون کا نیا مرحلہ‘: ریاض آرٹ کا نیا تخلیقی مرکز ’لا فابریک‘ متعارف

ریاض آرٹ نے سعودی عرب میں فرانسیسی انسٹی ٹیوٹ کے تعاون سے ’لا فابریک‘ کا آغاز کیا جو جاکس ڈسٹرکٹ میں واقع ریاض آرٹ ہب میں فنونِ لطیفہ کی تخلیقی صلاحیت اور ثقافتی تبادلے کے لیے ایک نیا مخصوص مقام ہے۔

سعودی پریس ایجنسی ایس پی اے کے مطابق یہ منصوبہ 22 جنوری سے 14 فروری تک جاری رہے گا اور سعودی عرب اور فرانس کے درمیان جاری ثقافتی شراکت داری کا حصہ ہے۔

لا فابریک ایک کھلا اور تخلیقی مرکز ہے جہاں فنکار اپنے خیالات کو بہتر کر سکتے ہیں۔ یہاں پرفارمنیس آرٹ، ڈیجیٹل اور انٹرایکٹیو آرٹس، فوٹوگرافی، موسیقی، سنیما اور دیگر فنون پیش کیے جاتے ہیں۔

یہ مقام عوام کو موقع دیتا ہے کہ وہ تخلیقی عمل میں براہِ راست حصہ لیں اور فن پاروں کے تخلیقی مراحل کو قریب سے دیکھ سکیں۔ اس کا مقصد فن کو عوامی مقامات پر مزید مضبوط بنانا اور اسے کمیونٹی کے قریب لانا ہے۔

سعودی عرب میں فرانسیسی سفیر پیٹرک میسوناوے نے کہا کہ لا فابریک سعودی فرانسیسی ثقافتی تعاون کا ایک نیا مرحلہ ہے اور اس بات کی تصدیق کی کہ دونوں ممالک کے فنکاروں کو ایک مشترکہ تخلیقی ماحول میں لانا مہارت اور خیالات کے تبادلے کو ممکن بناتا ہے۔

انہوں نے مزید کہا کہ یہ اقدام جدید فنونِ لطیفہ کو فروغ دینے میں مدد دیتا ہے جو ثقافتی شراکت داری کی گہرائی کی عکاسی کرتا ہے اور فنونِ لطیفہ کو معاشروں کے درمیان رابطے اور باہمی تفہیم کا ذریعہ بناتا ہے۔

کمیشن فار ریاض سٹی کے سینیئر ڈائریکٹر آف پبلک آرٹ عمر البریک نے کہا کہ لا فابریک کا آغاز ریاض آرٹ کی جدید فنونِ لطیفہ کی حمایت اور تخلیقی ترقی کے مواقع کو بڑھانے کے عزم کو مزید مضبوط کرتا ہے۔

انہوں نے مزید کہا کہ یہ جگہ مشترکہ کام کے لیے پلیٹ فارم فراہم کرتی ہے، ریاض کے ثقافتی ماحولیاتی نظام اور بڑھتے ہوئے تخلیقی منظرنامے کو مضبوط بناتی ہے۔