اسلامی کانفرنس تنظیم کے غیر معمولی وزراتی اجلاس میں شرکت کے لیے اسحاق ڈار جدہ روانہ

پاکستان کے نائب وزیراعظم اور وزیر خارجہ اسحاق ڈار اسلامی کانفرنس تنظیم کے غیر معمولی اجلاس میں شرکت کے لیے سعودی عرب روانہ ہو گئے ہیں۔
دفتر خارجہ کے مطابق اسحاق ڈار جدہ میں جمعرات سے سنیچر تک ہونے والے اسلامی کانفرنس تنظیم کی ایگزیکٹیو کمیٹی کے غیر معمولی وزراتی اجلاس میں شرکت کریں گے۔
 اسلامی کانفرنس تنظیم کی ایگزیکٹیو کمیٹی کا غیر معمولی وزراتی اجلاس جمعرات کی شب جدہ میں شروع ہو گا۔
اس اجلاس میں اسرائیلی حکام کی جانب سے کیے گئے غیر قانونی اقدامات کا جائزہ لیا جائے گا جن میں بستیوں کی توسیع، فلسطینیوں کی بے دخلی اور مقبوضہ مغربی کنارے پر اسرائیل کا تسلط جمانے جیسے ایشوز شامل ہیں۔     
دفتر خارجہ کے مطابق اسحاق ڈار اجلاس کے موقع پر او آئی سی کے رکن ممالک کے وزرائے خارجہ اور اپنے ہم منصبوں سے ملاقاتیں بھی کریں گے جن میں باہمی دلچسپی کے امور اور امتِ مسلمہ کو درپیش چیلنجز پر تبادلہ خیال کیا جائے گا۔