ایرانی سکول پر حملے کی تحقیقات، ’امریکی فوج ذمہ دار ہو سکتی ہے‘

امریکہ کے دو سرکاری عہدیداروں نے کہا ہے کہ ایران میں لڑکیوں کے ایک سکول پر حملے کی تحقیقات کرنے والے اہلکاروں کا خیال ہے کہ اس کی ذمہ دار امریکی فوج ہو سکتی ہے تاہم تحقیقات ابھی مکمل نہیں ہوئی ہیں۔

اس واقعے میں بڑی تعداد میں بچیاں ہلاک ہو گئی تھیں۔

برطانوی خبر رساں ادارے روئٹرز کے مطابق دو امریکی حکام نے نام ظاہر نہ کرنے کی شرط پر اس کو بتایا کہ ابھی تک سنیچر کو ایران میں ایک سکول پر ہونے والے حملے کی تحقیقات کسی نتیجے تک نہیں پہنچی ہیں۔

 خبر رساں ادارے کے مطابق تحقیقات کے حوالے سے مزید تفصیلات کا تعین نہیں کیا جا سکا، بشمول ان نکات کے کہ اب تک سامنے آنے معلومات کے حوالے سے کون سے عارضی شواہد ملے، کس قسم کا گولہ بارود استعمال کیا گیا۔ ذمہ دار کون تھا اور امریکہ کی جانب سے سکول پر حملہ کیوں کیا گیا۔

امریکہ کے سیکریٹری دفاع پیٹ ہیگستھ نے بدھ کے روز یہ تسلیم کیا تھا کہ امریکہ کے سکول پر حملے کے واقعے کی تحقیقات کی جا رہی ہیں۔

سرکاری اہلکاروں نے روئٹرز کے ساتھ بات میں اس امکان کو رد نہیں کیا کہ ایسے نئے شواہد بھی سامنے آ سکتے ہیں جن سے واقعے میں کسی اور فریق کے ملوث ہونے کے اشارے مل جائیں اور امریکی فوج کو بری الذمہ قرار دے دیا جائے۔

خیال رہے امریکہ اور اسرائیل نے سنیچر کو ایران پر حملے کیے تھے جس کے تھوڑی دیر بعد ایرانی حکام کی جانب سے بتایا گیا تھا کہ لڑکیوں کے ایک سکول کو نشانہ بنایا گیا ہے جس میں بڑی تعداد میں بچیاں ہلاک ہوئیں۔