خودمختاری، انصاف اور امن: سعودی عرب میں یومِ پرچم

مملکتِ سعودی عرب آج 11 مارچ کو یومِ پرچم منا رہی ہے جو 1937 میں شاہ عبدالعزیز کے قومی پرچم کے حتمی ڈیزائن کی منظوری کی مناسبت سے منایا جاتا ہے۔

سعودی پریس ایجنسی (ایس پی اے) کے مطابق خادم الحرمین شریفین شاہ سلمان بن عبدالعزیز آل سعود نے 2023 میں شاہی فرمان جاری کیا تھا جس کے تحت یہ دن منایا جاتا ہے۔

بانی ممکت شاہ عبدالعزیز نے گیارہ مارچ 1937 کو موجودہ قومی پرچم کی منظوری دی تھی۔

پرچم کا سبز رنگ ترقی کی ترجمانی کرتا ہے جبکہ کلمہ طیبہ امن اور اسلامی عقیدے کی علامت ہے جبکہ تلوار انصاف اور امن و امان کی ترجمان ہے۔

سعودی پرچم کو دنیا کے تمام ممالک کے پرچموں میں انفرادیت حاصل ہے۔ دیگر ملکوں کی طرح سعودی پرچم سرنگوں ہوتا ہے اور نہ معزز مہمانوں کو گارڈ آف آنر دیتے ہوئے پرچم جھکایا جاتا ہے۔

مملکت کے قانون کے مطابق سعودی پرچم تجارتی ٹریڈ مارک یا اشتہاری مقاصد کے لیے استعمال نہیں کیا جاسکتا۔

قومی پرچم مملکت کے اندر تمام سرکاری عمارتوں اور عوامی اداروں پر لہرایا جاتا ہے۔ بیرون مملکت سفارتخانوں، قونصل خانوں اور سرکای تعطیلات میں بھی سعودی پرچم سربلند رہتا ہے۔