لیجنڈری انڈین گلوکارہ آشا بھوسلے علالت کے باعث ہسپتال داخل

انڈیا کی لیجنڈری گلوکارہ آشا بھوسلے کو ہفتے کے روز دل اور سانس کے مسائل کے باعث بریچ کینڈی ہسپتال کے آئی سی یو میں داخل کیا گیا۔

ہندوستان ٹائمز کے مطابق 92 سالہ گلوکارہ گزشتہ چند ماہ سے علیل تھیں۔ ہسپتال ذرائع کے مطابق ان کی حالت نہایت تشویشناک ہے۔

اہلِ خانہ کی جانب سے تاحال ان کی علالت کے حوالے سے کوئی بیان جاری نہیں کیا گیا، جبکہ صحت سے متعلق مزید تفصیلات کا انتظار ہے۔

انڈین وزیرِ اعظم نریندر مودی نے آشا بھوسلے کے حوالے سے ایکس پر پوسٹ کرتے ہوئے کہا ’آشا بھوسلے جی کے ہسپتال میں داخل ہونے کی خبر سن کر شدید تشویش ہوئی ہے۔ ان کی جلد صحتیابی اور کامل صحت کے لیے دعاگو ہوں۔‘

آشا بھوسلے انڈین فلمی صنعت کی کامیاب ترین گلوکاراؤں میں شمار ہوتی ہیں۔ آٹھ دہائیوں پر محیط اپنے کیریئر میں انہوں نے متعدد زبانوں میں فلموں اور البمز کے لیے گیت ریکارڈ کیے اور کئی اعزازات اپنے نام کیے۔

انہیں دادا صاحب پھالکے ایوارڈ سے بھی نوازا گیا، جبکہ 2008 میں انہیں ملک کے دوسرے بڑے سول اعزاز پدم وبھوشن سے بھی دیا گیا۔

ان کے مشہور گیتوں میں ’دل چیز کیا ہے‘، ’ان آنکھوں کی مستی کے‘، ’یہ کیا جگہ ہے دوستو‘، ’جب بھی ملتی ہے‘ اور ’جستجو جس کی تھی‘ شامل ہیں۔

2023  میں ہندوستان ٹائمز کو دیے گئے ایک انٹرویو میں انہوں نے موجودہ موسیقی کے منظرنامے پر بات کرتے ہوئے کہا ’اگر میں سچ کہوں تو میں آج کل کے گانے سنتی ہی نہیں ہوں۔ اگر سننا ہو تو میں (مرحوم گلوکار) بھیم سین جوشی کے گانے، کلاسیکی موسیقی اور غزلیں سنتی ہوں کیونکہ اس سے مجھے سیکھنے، اپنی صلاحیت نکھارنے اور ریاض بہتر کرنے میں مدد ملتی ہے۔ اس طرح میری گائیکی میں بہتری آتی ہے اور میں مزید بہتر انداز میں گا سکتی ہوں۔‘

انہوں نے مزید کہ ’آج کل مجھے بہترین شاعری والے گانے کم ہی ملتے ہیں، لیکن کبھی کبھار سن لیتی ہوں اور بعض اوقات راحت فتح علی خان اور سنیدھی چوہان کے کچھ اچھے گانے سننے کو مل جاتے ہیں۔ مگر میں شاذ و نادر ہی موسیقی سنتی ہوں، اور اگر سنوں تو پرانے گانے ہی سنتی ہوں۔‘

چند روز قبل اداکارہ تبو نے ایک یادگار لمحہ شیئر کیا جب آشا بھوسلے نے انہیں گٹار تحفے میں دیا۔ انہوں نے انسٹاگرام پر تصاویر کے ساتھ لکھا ’اپنی زندگی کے سب سے یادگار دنوں کے بارے میں بتائیں۔۔۔ وہ لمحے جو آپ کبھی نہیں بھول سکتے۔۔۔ وہ چیزیں جو آپ کے لیے سب سے قیمتی ہیں۔ نومبر میں میری سالگرہ تھی اور میرے دروازے پر یہ خوبصورت گٹار موجود تھا، شا جی کا تحفہ۔‘

انہوں نے مزید لکھا ’میرے جذبات کو الفاظ میں بیان کرنا ممکن نہیں۔ میں آپ سے بے حد محبت اور احترام کرتی ہوں آشا جی۔ آپ کے گانوں کے ذریعے ہم نے محبت، تڑپ، درد اور جذبہ محسوس کیا۔ میں اسے زندگی بھر سنبھال کر رکھوں گی اور امید ہے کہ جلد ہی آپ کے سامنے آپ کے گانے اسی گٹار پر بجا سکوں گی۔‘