شہباز شریف کی ایرانی صدر سے گفتگو، تنازع کے حل میں پاکستان کی مدد کے عزم کا اعادہ

پاکستان کے وزیرِ اعظم شہباز شریف نے ہفتے کے روز کہا کہ انہوں نے ایرانی صدر مسعود پزشکیان سے ٹیلی فون پر بات کی۔

اسلام آباد میں امریکہ اور ایران کے درمیان امن مذاکرات کے دوسرے دور کو اس وقت منسوخ کر دیا گیا جب صدر ٹرمپ نے اپنے نمائندوں کی اسلام آباد روانگی منسوخ کردی۔

تاہم پاکستان کے وزیراعظم شہباز شریف نے پاکستان کی جانب سے تنازع کے حل میں مدد کے عزم کا اعادہ کیا۔

شہباز شریف نے ایکس پر لکھا کہ ’آج شام میرے بھائی، صدر مسعود پزشکیان کے ساتھ موجودہ علاقائی صورتحال پر ایک گرمجوش اور تعمیری ٹیلی فونک گفتگو ہوئی۔

میں نے ایران کی مسلسل شمولیت کو سراہا، جس میں اسلام آباد آنے والا اعلیٰ سطح کا وفد بھی شامل ہے جس کی قیادت وزیرِ خارجہ عباس عراقچی کر رہے تھے، جن سے آج پہلے میری ملاقات کا بھی موقع ملا۔‘

وزیراعظم نے مزید لکھا کہ انہوں نے اس بات کا اعادہ کیا کہ دوست ممالک اور شراکت داروں کی حمایت سے پاکستان ایک ایماندار اور مخلص سہولت کار کے طور پر اپنا کردار ادا کرنے کے لیے پُرعزم ہے، اور خطے میں پائیدار امن اور دیرپا استحکام کے فروغ کے لیے مسلسل کام کرتا رہے گا۔

قبل ازیں سنیچر کی شام کو پاکستان کے دورے پر موجود ایرانی وزیرخارجہ عباس عراقچی نے شہباز شریف سے ملاقات کی تھی جس میں دونوں ممالک کے تعلقات اور خطے کی موجودہ صورتحال پر بات چیت کی گئی۔

سنیچر کو وزیر اعظم ہاؤس میں ہونے والی اس ملاقات میں پاکستان کے نائب وزیر اعظم و وزیر خارجہ اسحاق ڈار اور آرمی چیف فیلڈ مارشل عاصم منیر بھی موجود تھے۔

سرکاری بیان کے مطابق ملاقات میں خطے میں کشیدگی، امن و استحکام اور جاری سفارتی کوششوں پر تبادلۂ خیال کیا گیا۔

پاکستان سے روانگی کے بعد ایکس اکاؤنٹ میں جاری ایک بیان میں عباس عراقچی نے کہا کہ ’پاکستان کا نہایت مفید دورہ رہا، اور ہم اپنے خطے میں امن بحال کرنے کے لیے پاکستان کی نیک خدمات اور برادرانہ کوششوں کو بہت قدر کی نگاہ سے دیکھتے ہیں۔ ہم نے ایران کی اس پوزیشن کو شیئر کیا جس میں جنگ کو مستقل طور پر ختم کرنے کے لیے ایک قابلِ عمل فریم ورک پیش کیا گیا ہے۔ ابھی یہ دیکھنا باقی ہے کہ آیا امریکہ واقعی سفارتکاری کے حوالے سے سنجیدہ ہے یا نہیں۔‘