فجیرہ آئل انڈسٹری زون پر ڈرون حملے میں تین انڈین شہری زخمی

متحدہ عرب امارات میں فجیرہ آئل انڈسٹری زون پر ایران کے ڈرون حملے میں تین انڈین شہری زخمی ہوگئے۔

فجیرہ میڈیا آفس نے بیان میں کہا’ تینوں زخمیوں کو علاج کے لیے ہسپتال منتقل کردیا گیا ہے۔‘

 حکام نے تصدیق کی کہ فجیرہ آئل انڈسٹری زون میں ایران کی جانب سے ڈرون حملے کے نتیجے میں آگ بھڑک اٹھی ہے۔

فجیرہ سول ڈیفنس کی ٹیموں نے فوری طور پر موقع پر پہنچ کر کارروائی شروع کی، آگ پر قابو پانے کی کوششیں جاری ہیں۔

بیان میں حکام نے عوام سے اپیل کی کہ افواہوں سے گریز کریں اور معلومات کے لیے صرف سرکاری ذرائع پر انحصار کریں۔

اس سے قبل اماراتی حکام نے بتایا تھا کہ اس کے فضائی دفاعی نظام نے ایران سے داغے گئے چار میزائلوں کا جواب دیا ہے۔

اماراتی وزارتِ دفاع کے بیان کہا گیا تھا کہ ان میں سے تین میزائلوں کو فضا میں ہی تباہ کر دیا گیا جبکہ چوتھا میزائل سمندر میں جا گرا۔

واضح رہے کہ فجیرہ اس پائپ لائن کا آخری سرا ہے جسے متحدہ عرب امارات ایران کے ساتھ جنگ کے دوران آبنائے ہرمز کے خطرناک راستے سے بچ کر تیل کی ترسیل کے لیے استعمال کرتا رہا ہے۔

 پیر کو اماراتی حکام نے شہریوں کے موبائل فونز پر ممکنہ حملے کے حوالے سے نیا ہنگامی الرٹ بھی جاری کیا تھا۔