’اپنا گھر پروگرام‘ سکیم کے تحت ایک کروڑ روپے تک قرض کیسے حاصل کیا جا سکتا ہے؟

پاکستان کی حکومت نے ’وزیراعظم اپنا گھر پروگرام 2026‘ سکیم کے تحت شہریوں کو گھروں کی تعمیر کے لیے قرض فراہم کرنے کے بڑے منصوبے کا اعلان کیا ہے۔

اس منصوبے کی خاص بات یہ ہے کہ اس کے لیے نہ صرف پاکستان میں مقیم شہری درخواست دے سکتے ہیں بلکہ اوورسیز پاکستانیوں کو بھی باقاعدہ طور پر اس سکیم کا حصہ بنایا گیا ہے۔

قرض کتنا ملے گا اور کتنے گھر تعمیر ہوں گے؟

وفاقی حکومت نے ’وزیراعظم اپنا گھر پروگرام 2026‘ کے تحت بے گھر افراد اور متوسط طبقے کے لیے مجموعی طور پر 5 لاکھ گھروں کی تعمیر کا ہدف مقرر کیا ہے۔

ابتدائی طور پر اس حکومتی سکیم میں سمندر پار پاکستانیوں کو شامل نہیں کیا گیا تھا، تاہم اقتصادی رابطہ کمیٹی کے حالیہ فیصلے کے بعد اوورسیز پاکستانی بھی اپنے نائیکوپ اور روشن ڈیجیٹل اکاؤنٹ کے ذریعے اس سکیم میں شامل ہو سکتے ہیں۔
اپلائی کرنے کا طریقہ کار مکمل طور پر سادہ اور ڈیجیٹل رکھا گیا ہے۔ مقامی اور بیرونِ ملک مقیم پاکستانی آفیشل پورٹل apnaghar.gov.pk پر آن لائن درخواست جمع کروا سکتے ہیں، جس کی منظوری کا عمل تمام دستاویزی کارروائی مکمل ہونے کے بعد 30 دن کے اندر مکمل کیا جائے گا۔
وزیراعظم اپنا گھر پروگرام 2026 کے تحت اہلیت کا دائرہ کار وسیع رکھا گیا ہے، جس میں سرکاری ملازمین کے ساتھ ساتھ نجی اداروں کے ورکرز اور چھوٹے بڑے کاروباری افراد بھی اپلائی کر سکتے ہیں۔
حکومت کی فراہم کردہ تصدیق شدہ معلومات کے مطابق نجی شعبے سے وابستہ افراد اپنی سیلری سلپ یا چھ ماہ کی بینک سٹیٹمنٹ کے ذریعے درخواست دے سکتے ہیں۔

اسی طرح کاروباری حضرات اور فری لانسرز اپنے ٹیکس ریٹرنز یا بینک ٹرانزیکشنز کو آمدنی کے ثبوت کے طور پر پیش کر کے اس سکیم سے فائدہ اٹھا سکتے ہیں۔
وزیراعظم نے بینکوں کو خصوصی طور پر پابند کیا ہے کہ وہ مخصوص طبقوں تک محدود رہنے کے بجائے ہر اس شہری کو قرض فراہم کریں جو قسط ادا کرنے کی سکت رکھتا ہو۔
’سکیم کتنی کامیاب ہو گی یہ وقت ہی بتائے گا‘
ماہرین کا کہنا ہے کہ گذشتہ حکومتوں میں بھی ایسی سکیموں کا اعلان کیا گیا تھا، لیکن ناقص حکمتِ عملی اور زمینی حقائق مختلف ہونے کی وجہ سے اُن پر مکمل عمل درآمد نہ ہو سکا۔
لہٰذا موجودہ حکومت کے لیے ضروری ہے کہ وہ سخت حکمتِ عملی اپناتے ہوئے چار سال کی مدت کے اندر ان گھروں کی تعمیر مکمل کرے اور سُود کی شرح کو کم سے کم رکھے۔