معرکہ حق عظیم فتح، دنیا میں آج پاکستان کے دوستوں کی تعداد ماضی سے کہیں زیادہ ہے: فیلڈ مارشل
پاکستان فوج کے سربراہ فیلڈ مارشل عاصم منیر نے کہا ہے کہ پچھلے برس آج ہی کے دن پاکستان نے صرف جنگی کامیابی نہیں سمیٹی بلکہ عالمی سطح پر ملک کے وقار اور اہمیت میں بھی اضافہ ہوا۔
اتوار کو جی ایچ کیو راولپنڈی میں ہونے والی معرکہ حق کی تقریب سے خطاب کرتے ہوئے فیلڈ مارشل عاصم منیر نے انڈیا کے حملے اور اس کے جواب میں ہونے والے اقدامات کا تذکرہ کیا۔
انہوں نے کہا کہ دشمن کا خیال تھا کہ وہ طاقت کا توازن تبدیل کر دے گا مگر وہ بھول گیا کہ پاکستان پہلے کبھی طاقت سے مرعوب ہوا اور نہ آئندہ کبھی ہو گا۔
ان کے مطابق ’آج کا دن سب کے لیے افتخار کا باعث ہے اور ہمیں ایک بے مثال کامیابی ملی، جس پر آنے والی نسلیں بھی ناز کریں گی۔‘
فیلڈ مارشل کا یہ بھی کہنا تھا کہ معرکہ حق دو ممالک کے بیچ ہونے والی ایک لڑائی نہیں تھی بلکہ دو نظریات کے درمیان ایک فیصلہ کن معرکہ تھا، جس میں حق کو فتح ملی۔
انہوں نے کہا کہ پچھلے برس دشمن نے ہمارے قومی وقار کو آزمانے کی ناکام کوشش کی تھی۔
’پچھلے برس مئی میں ہونے والا معرکہ کوئی اچانک پیش آنے والا معرکہ نہیں تھا جس میں انڈیا کو جارحیت کا منہ توڑ جواب دیا گیا۔‘
فیلڈ مارشل عاصم نے یہ بھی کہا کہ پچھلے ایک برس کے دوران پاکستان کے قومی وقار میں بہت اضافہ ہوا جس اعتراف دنیا بھر میں ہو رہا ہے۔
’آج ماضی کے مقابلے میں دنیا بھر میں ہمارے دوستوں کی تعداد کہیں زیادہ ہے۔‘
انہوں نے سعودی عرب کے ساتھ سٹریٹیجک دفاعی معاہدے کو سفارتی کامیابیوں کا عظیم سنگ میل بھی قرار دیا۔
فیلڈ مارشل کے بقول ’دشمن جان لے کہ پاکستان کے خلاف ہونے والی کسی بھی مہم جوئی کے نتائج اب مزید خطرناک، دور رس اور تکلیف دہ ہوں گے، پاکستان کا دفاع کسی بھی قسم کی جارحیت کے خلاف مکمل طور پر ناقابل تسخیر ہے۔‘
