امریکہ سے دوسرے دور کے مذاکرات کا ابھی ارادہ نہیں: ایرانی وزارتِ خارجہ
ایران نے پاکستان میں ہونے والے مذاکرات کے دوسرے دور میں شرکت نہ کرنے کا اعلان کر دیا ہے۔
پیر کو تہران میں ایران کی وزارت خارجہ کے ترجمان اسماعیل بقائی نے میڈیا سے گفتگو میں کہا کہ امریکہ نے جنگ بندی کی خلاف ورزی کی جس کے بارے میں ثالث پاکستان کو بتا دیا ہے۔
انہوں نے واضح کیا کہ ’ایران کا مذاکرات کے دوسرے دور میں شریک ہونے کا کوئی ارادہ نہیں اور وفد پاکستان نہیں جائے گا۔‘
اسماعیل بقائی کے مطابق ’امریکہ نے پھر جارحیت کی تو سخت جواب دیا جائے گا۔‘
خیال رہے مذاکرات کا دوسرا بھی پاکستان کے دارالحکومت اسلام آباد میں ہونے جا رہا تھا جس کے لیے تیاریاں بھی کر لی گئی تھیں جبکہ صدر ٹرمپ نے بھی اعلان کیا تھا کہ پیر کی شامل کو ان کے نمائندے اسلام آباد پہنچ رہے ہیں۔
تاہم اتوار امریکی صدر ڈونلڈ ٹرمپ نے کہا کہ ناکہ بندی کی خلاف ورزی پر ایران کے ایک کارگو جہاز کو قبضے میں لیا گیا ہے جس کو ایران نے جنگ بندی کے معاہدے کی خلاف ورزی قرار دیا تھا۔
اس سے قبل مذاکرات کا ایک دور اسلام آباد میں ہو چکا ہے جس میں 10 اور 11 اپریل کو دونوں ملکوں کے نمائندوں نے بات چیت کی تاہم وہ کسی نتیجے تک پہنچے بغیر ختم ہو گئی تھی اور وفود واپس چلے گئے تھے۔
تاہم پاکستان پھر بھی متحرک رہا اور وزیراعظم شہباز شریف اور فوج کے سربراہ فیلڈ مارشل عاصم منیر کی کوشش کے نتیجے میں دونوں ممالک ایک بار پھر میز کے گرد بیٹھنے پر تیار ہوئے تھے۔
