قطر: فیکٹری میں دھماکے سے متعدد زخمی، آگ پر قابو پا لیا گیا

قطر کی وزارت داخلہ نے کہا ہے کہ اتوار کو دارالحکومت دوحہ کے شمال میں واقع صنعتی شہر راس لافان میں ’تکنیکی حادثے‘ کے نتیجے میں دھماکہ ہوا۔

برطانوی خبر رساں ادارے روئٹرز کے مطابق قطر کی وزارت داخلہ کی جانب سے جاری ہونے والے بیان میں بتایا گیا ہے کہ واقعہ اتوار کو راس لافان کی فیکٹری میں پیش آیا جو ملک میں ایل این جی پراسیسنگ آپریشنز کی سب سے بڑی سائٹ ہے۔

بیان کے مطابق واقعے میں متعدد افراد زخمی ہوئے ہیں تاہم گیس کے کسی ایسے اخراج کی اطلاع نہیں ملی جو سلامتی کے لیے خطرہ بن سکتی ہو۔

وزارت داخلہ کی جانب سے دھماکے کے درست مقام کے بارے میں نہیں بتایا گیا تاہم اس سے واقفیت رکھنے والے ایک سورس کا کہنا ہے کہ یہ واقعہ راس لافان میں واقع برزام گیس پلانٹ میں پیش آیا جس کی وجہ ایک ’آپریشنل غلطی‘ تھی۔

ایک عینی شاہد نے خبر رساں ادارے روئٹرز کو بتایا کہ دارالحکومت دوحہ میں ایک زوردار دھماکے کی آواز سنی گئی۔