شام کا دہشت گردی کی مالی معاونت کی فہرست سے اخراج، صدر الشرع کا کریڈٹ کارڈ استعمال کر کے جشن

صدر احمد الشرع نے شام کے دہشت گردی کے ریاستی معاونین کی فہرست سے اخراج اور عالمی مالیاتی نظام میں واپسی کا اعلان دمشق میں ایک ادائیگی مشین (پی او یس) پر کافی کی قیمت ادا کرتے ہوئے کیا۔

عرب نیوز کے مطابق جمعرات کی صبح جاری کردہ ایک ویڈیو میں الشرع نے ویزا کارڈ کے ذریعے کافی کی قیمت ادا کی جب وہ ملک کے مرکزی بینک کے گورنر صفوت رسلان کے ساتھ بیٹھے تھے۔

رسلان نے یہ ویڈیو ایکس پر پوسٹ کرتے ہوئے کہا کہ ’شام کو دہشت گردی کے ریاستی معاونین کی فہرست سے نکالے جانے کے بعد صدر احمد الشرع کے ساتھ بیٹھ کر ویزا کارڈ کے ذریعے پہلی ادائیگی میرے لیے ایک ایسا احساس ہے جسے الفاظ میں بیان کرنا مشکل ہے۔‘

پیر کو امریکہ نے ایک تاریخی قدم اٹھاتے ہوئے 47 سال بعد شام کو اس فہرست سے نکال دیا، جس سے عرب ملک کو اس نامزدگی کے شدید معاشی نتائج سے آزادی ملی۔

امریکی وزیر خزانہ سکاٹ بیسنٹ نے ایک بیان میں کہا کہ ’آج کا اقدام شام میں مزید سرمایہ کاری کو فروغ دے گا تاکہ سیاسی اور معاشی استحکام کو آگے بڑھایا جا سکے۔‘

الشرع کی قیادت میں باغیوں نے دسمبر 2024 میں 13 سالہ تباہ کن خانہ جنگی کے بعد طویل عرصے سے حکمران بشار الاسد کو معزول کر دیا تھا۔

الشرع نے اس فیصلے کا خیرمقدم کرتے ہوئے کہا کہ ’شام نے ایک سیاہ داغ کو جھاڑ دیا ہے اور اپنے ماضی کے ایک تکلیف دہ باب کو پھاڑ کر ترقی، تعمیر نو اور بحالی کے راستے پر گامزن ہوا ہے۔‘