سعودی عرب پر حوثی ملیشیا کے نئے حملوں میں 13 افراد زخمی، کئی شہروں میں الرٹس جاری

حکام نے کہا ہے کہ سعودی عرب کے کئی شہروں پر یمن کی حوثی ملیشیا کے حملوں میں 13 افراد زخمی ہو گئے جبکہ منگل کو کئی شہروں کے لیے ممکنہ خطرے کے الرٹس جاری کیے گئے۔

عرب نیوز کے مطابق ایران کے حمایت یافتہ اس گروپ نے پیر کو خمیس مشیط، ابھا اور طائف کے شہری علاقوں کو بیلسٹک میزائلوں اور ڈرونز کے ذریعے نشانہ بنایا۔

یاد رہے سعودی عرب نے پیر کی صبح بھی چار جنوبی شہروں نجران، خمیس مشیط، جازان اور ابھا کے لیے ممکنہ خطرے کے حوالے سے الرٹس جاری کیے تھے تاہم ان کو واپس لے لیا گیا تھا۔

اتحادی فورسز کے ترجمان میجر جنرل ترکی المالکی نے سوشل میڈیا پر جاری ایک بیان میں کہا ہے کہ ’ان حملوں میں 13 شہری زخمی ہوئے جبکہ سات مکانات اور دو گاڑیوں کو نقصان پہنچا ہے۔‘

سعودی سول ڈیفنس نے ملک کے مغربی اور جنوبی علاقوں کے شہروں ابھا، جدہ، جازان، طائف، ینبع اور العلا کے لیے متعدد الرٹس جاری کیے۔

اتحادی فورسز کے ترجمان بیان میں کہا گیا کہ ’دہشت گرد حوثی ملیشیا مملکت میں شہروں اور سول تنصیبات پر دانستہ اور گھناؤنے حملے جاری رکھے ہوئے ہیں۔‘

’ان مسلسل اور جان بوجھ کر کیے جانے والے حملوں سے ظاہر ہوتا ہے کہ دہشت گرد حوثی ملیشیا کشیدگی بڑھانے اور شہریوں و شہری تنصیبات کو نشانہ بنانے کی پالیسی پر عمل پیرا ہے۔‘

ترجمان نے کہا کہ اتحادی فورسز ان حملوں سے مملکت کی خود مختاری، سول انفراسٹرکچر اور شہریوں کے تحفظ کے لیے ذمہ داری اور سختی کے ساتھ نمٹیں گی۔

’یہ جواب بین الاقوامی قانون ااور اقوام متحدہ کے چارٹر کے آرٹیکل 51 کے مطابق حق دفاع کے اصول، انسانی قانون اور اس کے روایتی اصولوں کی پاسداری کرتے ہوئے دیا جائے گا۔‘

اس کے علاوہ اتحادی فورسز اس دہشت گرد ملیشیا کو روکنے، دشمنانہ اور انتہا پسندانہ طرزِ عمل کا مقابلہ کرنے کے لیے تمام ضروری آپریشنل اقدامات بھی کرے گی۔

گزشتہ ہفتے سعودی عرب کے مخلتف علاقوں میں حوثی ملیشیا کے حملوں میں خواتین اور بچوں سمیت 70 افراد زخمی ہوئے تھے۔ مملکت نے جمعے کو ریاض اور مدینہ کے علاقوں کو متعدد ڈرون حملوں سے نشانہ بنائے جانے کے بعد ایسٹ ویسٹ پائپ لائن کو عارضی طور پر بند کر دیا تھا۔

خلیجی ملکوں اور اسلامی تنظیموں نے پائب لائن پر ہونے والے حملے کی مذمت کرتے ہوئے سعودی عرب کے ساتھ یکجہتی کا اظہار کیا۔