پی ٹی آئی لانگ مارچ، ایم ون اور جی ٹی روڈ کے کون کون سے حصے آج بند ہوں گے؟
پی ٹی آئی لانگ مارچ، ایم ون اور جی ٹی روڈ کے کون کون سے حصے آج بند ہوں گے؟
بدھ 23 ستمبر 2026 8:37
پاکستان تحریک انصاف نے 27 ستمبر کو اسلام آباد کی طرف لانگ مارچ کا اعلان کر رکھا ہے (فائل فوٹو: اے ایف پی)
نیشنل ہائی ویز اینڈ موٹر وے پولیس نے اعلان کیا ہے کہ آج موٹر وے اور جی ٹی روڈ کے کچھ حصوں کو بند کیا جا رہا ہے جبکہ اسلام آباد میں سکیورٹی کے انتظامات مزید سخت اور صوبہ پنجاب میں دفعہ 144 نافذ کر دی گئی ہے۔
بدھ کو این ایچ ایم پی کے آفیشل ایکس اکاؤنٹ پر کی گئی پوسٹ میں بتایا گیا ہے کہ 23 ستمبر 2026 کو شام کے وقت ایم ون اسلام آباد ٹول پلازہ تا چھچھ، ایم 14 ہکلہ تا کنڈل کو ٹریفک کے لیے بند کر دیا جائے گا۔
اس میں جی ٹی روڈ کے حوالے سے بتایا گیا ہے کہ این فائیو اٹک خورد کے مقام پر بھی دونوں اطراف سے ہر قسم کی ٹریفک بند رہے گی۔
اس میں یہ نہیں بتایا گیا کہ یہ مقامات کب تک بند رہیں گے اور کب انہیں دوبارہ کھولا جائے گا۔
اس سے قبل 21 ستمبر کو بھی موٹروے ایم ون پر کرنل شیر خان انٹرچینج کو بند کر دیا گیا تھا تاہم بعدازاں کھول دیا گیا تھا۔
اسی طرح سیاسی جماعتوں کے احتجاج اور سکیورٹی کی صورت حال کے باعث سوات موٹر وے ایم 16 کو بھی بند کرنے کی اطلاعات سامنے آئی تھیں۔
پوسٹ میں عوام کو ہدایت بھی کی گئی ہے کہ وہ سفر شروع کرنے سے قبل تازہ ترین ٹریفک صورت حال اور سفری معلومات کے لیے نیشنل ہائی ویز اینڈ موٹر وے کے آفیشل سوشل میڈیا اکاؤنٹ @NHMPofficial سے معلومات حاصل کریں یا ٹول فری ہیلپ لائن 130 پر رابطہ کریں۔
پوسٹ میں اس بندش کی وجہ نہیں بتائی گئی تاہم چند روز سے شاہراہوں کے علاوہ اسلام آباد شہر کے اندر بھی خصوصی انتظامات دیکھنے کو مل رہے ہیں۔
پنجاب میں دفعہ 144 نافذ، پانچ سے زائد افراد کے اجتماع پر پابندی
پنجاب کے محکمہ داخلہ کے ترجمان نے کہا ہے کہ صوبے بھر میں دفعہ 144 نافذ کر دی گئی ہے اور آج سے عوامی مقامات، شاہراہوں یا کھلی جگہ پر 5 یا زائد افراد کے اجتماع، جلوس یا اکٹھ پر مکمل پابندی عائد ہے جو پانچ اکتوبر تک جاری رہے گی۔
پنجاب کے محکمہ داخلہ کے ترجمان نے کہا ہے کہ صوبے میں دفعہ 144 نافذ کر دی گئی ہے (فوٹو: اے پی پی)
بیان کے مطابق عوامی مقامات پر ہتھیار لے جانے اور نمائش پر بھی مکمل پابندی عائد ہے جبکہ لوگوں کو غیرقانونی اجتماعات میں شرکت پر اکسانے یا ترغیب دینے پر بھی پابندی ہے۔
پابندی کا اطلاق شادی کی تقریبات، نماز جنازہ، تدفین، مساجد و دیگر عبادت گاہوں پر نہیں ہو گا۔
اسلام آباد میں کنٹینرز اور سکیورٹی کے سخت انتظامات
پاکستان تحریک انصاف نے احتجاج کے اعلان کے بعد اس پرعملدرآمد بھی شروع کر دیا ہے جبکہ اس کی جانب سے 27 ستمبر کو اسلام آباد آنے کا اعلان بھی کیا گیا ہے۔
پشاور اور دوسرے شہروں میں اس حوالے سے سرگرمیاں دیکھی گئیں جبکہ مختلف علاقوں سے گرفتاریوں کی اطلاعات بھی موصول ہوئیں۔
اسلام آباد کے داخلی و خارجی راستوں کے علاوہ بھی کئی مقامات پر کنٹینر پہنچائے جا چکے ہیں جبکہ ریڈ زون کو سیل کر دیا گیا ہے۔
اگرچہ راستے ابھی مکمل طور پر بند نہیں کیے گئے تاہم انتظامات سے دکھائی دے رہا ہے کہ کسی بھی وقت کنٹینرز کی مدد سے راستے بند کر دیے جائیں گے۔
اسلام آباد میں کئی مقامات پر کنٹینرز پہنچا دیے گئے ہیں (فائل فوٹو: اے ایف پی)
دوسری جانب اسلام آباد میں دفعہ 144 بھی نافذ ہے اور شہر میں کسی بھی قسم کے جلسے، جلوس اور ریلیوں پر مکمل پابندی عائد ہے۔
اسلام آباد میں مظاہرین کا داخلہ روکنے کے لیے شہر کے اندرونی اور بیرونی راستوں پر ایک ہزار سے زائد کنٹینرز بھی رکھ دیے گئے ہیں۔
حکام کی جانب سے مسافروں کو ہدایت کی گئی ہے کہ وہ غیر ضروری سفر سے گریز کریں اور روانہ ہونے سے قبل موٹروے پولیس ایڈوائزری کی تازہ ترین صورتِ حال لازمی معلوم کریں۔
