امارات کے صدر کی اسرائیلی وزیراعظم سے دو طرفہ تعلقات پر بات چیت: سرکاری نیوز ایجنسی

متحدہ عرب امارات کی سرکاری نیوز ایجنسی وام نے کہا ہے کہ صدر شیخ محمد بن زاید النہیان نے اسرائیلی وزیراعظم بنیامین نیتن یاہو کے ساتھ ملاقات میں دو طرفہ تعلقات پر بات چیت کی جو اتوار کو دورے پر پہنچے تھے۔

برطانوی خبر رساں ادارے روئٹرز کے مطابق یہ رپورٹ یو اے ای کی جانب سے سرکاری سطح پر اسرائیلی وزیراعظم کے دورے کی پہلی تصدیق ہے۔

اسرائیلی وزیراعظم آفس نے پیر کے روز کہا تھا کہ نیتن یاہو نے اماراتی صدر کی دعوت پر متحدہ عرب امارات کا دورہ کیا تھا اور ملاقات میں ’دونوں ممالک کے تعلقات کی مضبوطی اور علاقائی چیلنجز‘ گفتگو کے مرکزی نکات رہے۔

تین سینیئر اسرائیلی حکام کا کہنا ہے کہ اتوار کو ہونے والی یہ ملاقات قریباً چھ گھنٹے تک جاری رہی تھی اور اس میں ایران سے متعلق معاملات پر بھی خصوصی توجہ دی گئی۔

مئی میں اسرائیلی پی ایم آفس نے دعویٰ کیا تھا کہ سال کے اوائل میں نیتن یاہو نے ’خفیہ طور پر‘ امارات کا دورہ کیا تھا اور صدر سے ملاقات کی تھی تاہم متحدہ عرب امارات کی جانب سے اس کی تردید کی گئی تھی۔

اس ملاقات سے واقفیت رکھنے والے ایک سورس نے اس وقت بتایا تھا کہ ’نیتن یاہو اور شیخ محمد بن زاید النہیان نے 26 مارچ کو العین میں ملاقات کی تھی جو کہ ابوظبی کا سرسبز شہر ہے جو عمان کی سرحد کے قریب واقع ہے۔‘

ایران جنگ کی وجہ سے حملوں کی زد میں آنے کے بعد متحدہ عرب امارات نے امریکہ اور اسرائیل کے ساتھ اپنے تعلقات کو مضبوط کیا ہے، اسرائیل کے ساتھ یہ تعلقات 2020 میں ہونے والے ابراہم معاہدے کے تحت قائم کیے گئے تھے۔

اسرائیل کے ساتھ تعلقات متحدہ عرب امارات کے لیے خطے میں اثر و رسوخ بڑھانے کا ذریعہ ہیں اور واشنگٹن سے رابطوں کا منفرد راستہ بھی ہیں۔