Sorry, you need to enable JavaScript to visit this website.

خیبرپختونخوا میں ایمرجنسی اور گورنر راج، سول انتظامیہ کی معاونت کے لیے فوج تعینات

پاکستان کے صدر آصف زرداری نے خیبرپختونخوا میں ایمرجنسی نافذ کر دی ہے اور وفاقی حکومت نے صوبے میں ایک 11 رکنی مشاورتی کونسل قائم کرنے  اور سول انتظامیہ کی معاونت کے لیے فوج کی تعیناتی کا باضابطہ حکم نامہ جاری کیا ہے۔
جبکہ دوسری طرف پاکستان تحریک انصاف کے رہنماؤں نے سوشل میڈیا پر بیانات میں دعویٰ کیا ہے کہ سہیل آفریدی کو گرفتار کر لیا گیا ہے۔
پی ٹی آئی کے رکن قومی اسمبلی شاہد خٹک نے اتوار کی دوپہر سہیل آفریدی کی گرفتاری کی تصدیق کرتے ہوئے ایک ایکس پوسٹ میں لکھا کہ ’وزیراعلیٰ خیبر پختونخوا سہیل آفریدی کو گرفتار کر لیا گیا ہے۔‘ 
اتوار کو ایوان صدر سے جاری بیان کے مطابق آصف علی زرداری نے خیبر پختونخوا میں سلامتی کی صورتحال پر وزیراعظم کی ایڈوائس پر دستخط کر دیے ہیں۔
آئینِ پاکستان کے آرٹیکلز 232 اور 234 کے تحت صدرِ مملکت نے وزیراعظم کی ایڈوائس منظور کرتے ہوئے دستخط کیے۔
وفاقی کابینہ کے فیصلے، وزیراعظم کی ایڈوائس، متعلقہ اداروں کی امن و امان کی صورتحال سے متعلق رپورٹس اور حکومتی وفود کے ساتھ مذاکرات کی ناکامی کے بعد صدرِ مملکت نے سمری پر دستخط کیے۔
گورنر خیبر پختونخوا نے کہا ہے کہ خیبر پختونخوا کے عوام صدارتی پروکلیمیشن کا خیرمقدم کرتے ہیں، خیبر پختونخوا کے عوام امن، استحکام، ترقی اور خوشحالی کے خواہاں ہیں۔
ان کا کہنا تھا کہ ’خیبر پختونخوا کے عوام نے فیصلہ کر لیا، مزید فتنہ الخوارج کا ساتھ نہیں دیں گے۔‘
وفاقی وزرا کی پریس کانفرنس
وفاقی وزیر داخلہ محسن نقوی نے کہا ہے کہ خیبرپختونخوا میں ایمرجنسی کے نفاذ کا فیصلہ ہمارے لیے آسان نہیں تھا۔ صوبائی حکومت کو اعتماد میں لینے کے لیے ایک ماہ سے زیادہ عرصے تک کوششیں کی گئیں، وفاقی حکومت کی کوشش تھی کہ خیبرپختونخوا حکومت کو ساتھ ملا کر دہشت گردی کا مقابلہ کیا جائے۔
اسلام آباد میں اتوار کو وزیر قانون اعظم نذیر تارڑ، وزیر اطلاعات عطااللہ تارڑ اور ثمر ہارون بلور کے ہمراہ پریس کانفرنس کرتے ہوئے محسن نقوی نے کہا کہ دہشت گردی کے خلاف جنگ تمام حکومتوں کو مل کر لڑنی چاہیے، اسی مقصد کے تحت وفاقی حکومت خیبرپختونخوا حکومت کے ساتھ مسلسل رابطے میں رہی اور مختلف معاملات پر پیشرفت جاری تھی۔
وزیر داخلہ کے مطابق پاکستان تحریک انصاف کے لانگ مارچ کے اعلان سے پہلے ہی اس کے بیشتر مطالبات پر پیشرفت ہو رہی تھی، جبکہ ملاقاتوں سمیت متعدد معاملات پر بھی کام جاری تھا۔
وزیر قانون اعظم نذیر تارڑ نے کہا کہ خیبرپختونخوا کی موجودہ صورتحال کے پیش نظر وزیراعظم کو آئینی طریقہ کار اختیار کرنے اور دستیاب آئینی آپشنز استعمال کرنے کا مشورہ دیا گیا۔
سول انتظامیہ کی معاونت کے لیے فوج کی تعیناتی

خیبر پختونخوا میں امن و امان اور شہریوں کے تحفظ کے لیے فوج سول انتظامیہ کی معاونت کرے گی: فائل فوٹو اے ایف پی

وفاقی حکومت نے خیبر پختونخوا میں سول انتظامیہ کی معاونت کے لیے فوج کی تعیناتی کا باضابطہ حکم نامہ جاری کر دیا
آئین کے آرٹیکل 245 کے تحت خیبر پختونخوا میں فوج کے دستوں اور وسائل کی تعیناتی کی منظوری دی گئی ہے اور فوج کی تعیناتی کا مقصد شہریوں کی جان و مال اور سرکاری تنصیبات کا تحفظ یقینی بنانا ہے
حکم نامے کے مطابق خیبر پختونخوا میں امن و امان اور شہریوں کے تحفظ کے لیے فوج سول انتظامیہ کی معاونت کرے گی۔ گورنر خیبر پختونخوا، جی ایچ کیو کے ملٹری آپریشنز ڈائریکٹوریٹ سے مشاورت کے بعد تعینات کیے جانے والے فوجی دستوں اور وسائل کی تعداد کا تعین کریں گے
تحریک انصاف کا ردعمل
پاکستان تحریک انصاف کے سربراہ بیرسٹر گوہر نے خیبر پختونخوا میں ایمرجنسی کے نفاذ کی مذمت کی ہے۔
سوشل میڈیا پر ایک بیان میں ان کا کہنا ہے کہ ’ہم صوبے میں ایمرجنسی کے نفاذ کی شدید الفاظ میں مذمت کرتے ہیں اور اس اقدام کو یکسر مسترد کرتے ہیں۔‘
’یہ ایک انتہائی تشویشناک اور سنگین سیاسی غلطی اور غیر جمہوری اقدام ہے- عوام اپنے حقوق کے خلاف ایسے اقدامات کو کبھی قبول نہیں کریں گے۔‘
ان کا کہنا ہے کہ ’خیبرپختونخوا کے عوام کا مینڈیٹ ان کا آئینی اور قانونی حق ہے۔ اس مینڈیٹ کو نظر انداز کرکے، صوبائی خودمختاری کو کمزور کر کے اور وفاق و صوبے کے درمیان تصادم پیدا کرکے نہ امن قائم کیا جاسکتا ہے اور نہ استحکام لایا جاسکتا ہے۔‘

بیان میں بتایا گیا کہ ’اس ضمن میں وزیرِ اعظم ہاؤس سے ایڈوائس ایوان صدر بھجوائی گئی۔‘ (فوٹو: سکرین گریب)

اس سے قبل وفاقی کابینہ نے اجلاس میں وزیراعظم کو خیبر پختونخوا میں ایمرجنسی لگانے کی تجویز دی تھی جس کے بعد سمری ایوان صدر بھجوا دی گئی تھی۔
اتوار کو وزیراعظم کے دفتر کی طرف سے جاری بیان کے مطابق’ وفاقی کابینہ کو خیبر پختونخوا  میں امن و امان کی صورتحال اور دہشت گردی کی بگڑتی ہوئی صورتحال پر بریفنگ دی گئی۔‘
’کابینہ نے خیبر پختونخوا میں امن و امان کی بگڑتی ہوئی صورتحال اور دہشت گردی کے خلاف جنگ سے صوبائی حکومت کی دانستہ لاتعلقی کے پیش نظر حالات کا تفصیلی جائزہ لیا۔‘
بیان کے مطابق ’کابینہ نے وزیرِ اعظم کو تجویز دی کہ وہ صدر مملکت کو مشورہ دیں کہ حالات کی سنگینی کے پیش نظر صدر مملکت آئینی اختیار استعمال کرتے ہوئے صوبہ خیبر پختونخوا میں آئین پاکستان کے آرٹیکل 232 اور 234 کے تحت ایمرجنسی کا نفاذ کریں۔‘
بیان میں بتایا گیا کہ ’اس ضمن میں وزیرِ اعظم ہاؤس سے ایڈوائس ایوان صدر بھجوائی گئی۔‘

 

شیئر: