ریڈ سی لیبز کا ساتواں فیچر فلم پروگرام، نئے ٹیلنٹ کی حوصلہ افزائی پر توجہ

ریڈ سی فلم فاؤنڈیشن کے حصہ ریڈ سی لیبز نے فلم انڈیپینڈنٹ کی شراکت داری سے کوریا کے دارالحکومت سیول میں فیچر فلمز پروگرام کے ساتویں ایڈیشن کو جاری رکھا۔ یہ پروگرام سعودی عرب، عرب دنیا، ایشیا اور افریقہ کے فلم سازوں کو ایک ساتھ لاتا ہے تاکہ نئے ابھرتے ہوئے ٹیلنٹ کی حمایت کی جا سکے اور ان کے فلمی منصوبوں کو آگے بڑھایا جا سکے۔

سعودی پریس ایجنسی (ایس پی اے) کے مطابق سیول کے اس مرحلے میں فلمی منصوبوں کی ترقی اور انڈسٹری کے پیشہ ور افراد کے ساتھ معلومات کے تبادلے پر مبنی ورکشاپس اور مخصوص سیشنز کا سلسلہ شامل تھا۔ ان سرگرمیوں کا مقصد شامل منصوبوں کے تخلیقی اور پیشہ ورانہ پہلوؤں کو مضبوط کرنا اور انہیں پروڈکشن اور مارکیٹنگ کے لیے تیار کرنا تھا۔

پروگرام میں ’انسپائر‘ سیریز کے تحت ایک بات چیت بھی شامل تھی جس میں یہ دیکھا گیا کہ مقامی ماحول اور ثقافتوں سے جڑی کہانیاں اپنی اصلیت اور ثقافتی شناخت کو برقرار رکھتے ہوئے عالمی ناظرین تک کیسے پہنچ سکتی ہیں۔

پروگرام کے ساتویں ایڈیشن میں 12 فلمی منصوبے شامل ہیں جن میں تین سعودی اور 9 بین الاقوامی منصوبے ہیں۔ فلم انڈسٹری کے ماہرین اور پیشہ ور افراد کی رہنمائی میں یہ منصوبے سکرپٹ رائٹنگ، ہدایت کاری اور پروڈکشن احاطہ کرنے والے مخصوص ترقیاتی مراحل سے گزر رہے ہیں۔

پروگرام کا مقصد منصوبوں کو بین الاقوامی فلمی مارکیٹوں کے لیے تیار کرنا اور ان کی ٹیموں کو پروڈیوسرز، تقسیم کاروں اور ممکنہ مددگاروں سے جوڑنا ہے۔ شریک ٹیمیں لاس اینجلس میں اپنا ترقیاتی سفر جاری رکھیں گی جس کے بعد وہ ریڈ سی انٹرنیشنل فلم فیسٹیول کے اگلے ایڈیشن کے دوران ریڈ سی سوق میں اپنے منصوبے پیش کریں گی۔