ڈاکٹر پرویز محمود کا قاتل گرفتار،بڑے انکشافات

کراچی: سابق ٹاﺅن ناظم ڈاکٹر پرویز محمود کے قتل کا معما بالآخر حل ہوگیا۔ ذرائع کے مطابق جماعت اسلامی کے ٹاﺅن ناظم ڈاکٹر پرویز محمود کے قتل کیس کی سماعت انسداد دہشت گردی کی خصوصی عدالت میں ہوئی۔ اس دوران پولیس نے بتایا کہ ڈاکٹر پرویز محمود کو ستمبر 2012ءمیں قتل کرنے والا ٹارگٹ کلر مسعدو علی عرف کالا گرفتار کرلیا گیا ہے جسے گزشتہ ماہ 30 نومبر کو حراست میں لیا گیا۔ پولیس نے عدالت کو بتایا کہ دوران تفتیش ٹارگٹ کلر نے سنسنی خیز انکشافات کیے ہیں۔ ملزم نے بتایا کہ وہ متحدہ قومی موومنٹ کے ٹارگٹ کلر اسکواڈ کا رکن ہے اور ڈاکٹر پرویز محمود کے قتل کے احکامات ایم کیو ایم کی تنظیمی کمیٹی کے انچارج حماد صدیقی نے دیے تھے جبکہ ناظم آباد اور رضویہ میں بھی احکامات ملنے پر کئی افراد کی ٹارگٹ کلنگ کی گئی۔ پولیس کے مطابق مسعود عرف کالا نے تفتیش کے دوران ڈاکٹر پرویزمحمود کی ٹارگٹ کلنگ کا اعتراف کرتے ہوئے بتایا کہ ڈاکٹرپرویزمحمود کو کے ڈی اے چورنگی کے قریب نشانہ بنایا۔ ملزم نے اپنی ٹارگٹ کلراسکواڈ کے ساتھ مقتولین کو نشانہ بنایا، جن میں عمران اعجازنیازی، طاہرقادیانی، زبیرعرف پپا، عبد الرحمن قریشی، جوائنٹ سیکٹرانچارج ریحان، آصف آلٹو، فیضان الیاس، سمیرنائی اورشکیل موٹا بھی شامل ہے۔ علاوہ ازیں ملزم کے قبضے سے اسلحہ اوردھماکا خیزمواد بھی برآمد ہوا ہے۔ بعد ازاں عدالت نے مفرورملزمان کے ناقابل ضمانت وارنٹ گرفتاری جاری کردیے اور 5 جنوری کو ملزمان کو گرفتارکرکے پیش کرنے سمیت تفتیشی افسرکو پولیس فائل کے ساتھ پیش ہونے کا حکم دے دیا۔