وینس میں جرمن سیاحتی جوڑے کو کافی 950 یورو میں پڑی

جرمن سیاحتی جوڑے کو اٹلی کے سیاحتی شہر وینس میں مشہور ریالٹو برج کی سیڑھیوں پر بیٹھ کر نہ صرف کافی پینا مہنگا پڑ گیا، بلکہ فوری طور پر شہربھی چھوڑنا پڑا۔

اٹالین حکام کے مطابق برلن سے تعلق رکھنے والا سیاحتی جوڑا اپنی تھکاوٹ دور کرنے کے لیے ریالٹو برج پر بیٹھ گیا، اس دوران انہوں نے اپنے پاس موجود کافی بنانے کا سامان نکالا اور اسے پینے لگے۔ ایسے میں قریب سے گزرنے والے شخص نے انہیں دیکھا اور پولیس کو رپورٹ کر دی۔

پولیس نے حال ہی میں لاگو ہونے والے قانون کے تحت انہیں 950 یورو جرمانہ کر دیا جس پر سیاحوں نے بحث و تکرار شروع کر دی، پولیس نے انہیں فوری طور پر وینس شہر چھوڑنے کا حکم دے دیا۔

وینس کے میئر لویگی بروگنارو نے کہا کہ ’وینس کے ساتھ عزت سے پیش آنا چاہیے اور ایسا نہیں ہو سکتا کہ غیر مہذب لوگ یہاں آ کر جو چاہے کریں، مقامی پولیس کی وجہ سے وہ ایسا نہیں کر سکتے، انہیں روکا جا سکتا ہے اور جرمانہ کیا جا سکتا ہے اور واپس بھی بھیجا جا سکتا ہے۔‘

میئر نے کہا کہ اب قوانین کی خلاف ورزی کرنے والوں کی شناخت اٹلی میں موجود ان کے سفارت خانوں سے شیئر کی جائے گی۔

مئی میں لاگو ہونے والے قوانین کے تحت وینس میں شائستگی، صفائی اور تحفظ کو یقینی بنانے کے اقدامات کیے گئے ہیں۔ وینس کی آبادی پچپن ہزار ہے لیکن یہاں سیر کے لیے ہر سال تین کروڑ لوگ آتے ہیں۔

قانون کے تحت مختلف سیاحتی مقامات پر پکنک منانے، فواروں میں نہانے اور عوامی جگہوں پر شرٹ نہ پہننے پر بھی پابندی ہے اور خلاف ورزی کرنے والوں کو بھاری جرمانے ادا کرنا پڑتے ہیں۔