Sorry, you need to enable JavaScript to visit this website.

کس کا گریبان پکڑا جا سکے

غلامی سے چھٹکارا تب ہی ممکن ہے جب یہ طے ہو جائے کہ اصل میں آقا کون ہے۔ فوٹو: اے ایف پی
ذرا تصور کیجیے فواد چوہدری، نعیم الحق، فردوس عاشق اعوان، جہانگیر ترین، شاہ محمود قریشی، بیرسٹر فروغ نسیم، بیرسٹر شہزاد اکبر، غلام سرور اعوان، شیخ رشید، ذلفی بخاری، انیل مسرت، فیاض الحسن چوہان، علی امین گنڈا پور، مراد سعید  اور بات بات پر اللہ کو جان دینے والے شہریار آفریدی وغیرہ جیسے جواہرِ نایاب پر مشتمل  بے لوث، ذہین، ایمان دار، اصول پسند، انصاف پسند گروہ کی تعمیر کردہ اکیسویں صدی کی ریاستِ مدینہ کا۔ اللہ اللہ ۔۔۔
گروہی محبت  اگر انسانوں کو آپس میں جوڑے تو نعمت اور فاصلے پیدا کرنے کا سبب بن جائے تو ایک عذاب۔ گروہ پرستی میں خرابی بس یہ ہے کہ پتہ نہیں چلتا کہ کب یہ جذبہ ایک عقل چوس خود پرست پنجرہ بن جائے اور کسی بھی  طبقے کو خود میں پوری طرح یوں بند کر لے کہ اسے پتہ بھی نہ چلے کہ وہ ایک مخصوص  سوچ اور ذات کا قیدی بن چکا ہے۔

 

اجتماع  کی یا اجتماع سے محبت کی دو اقسام ہیں۔ ایک وہ جو خود رو ہے لہذا بے ضرر ہے۔ دوسری قسم وہ ہے جو پروڈکٹ کی شکل میں کسی نظریاتی و نسلی و جغرافیائی فخر کی سوچ فیکٹری میں تیار ہوتی ہے اور اسے ایک پورے طبقے اور قوم کو گھٹی میں استعمال کروایا جاتا ہے اور جب یہ طبقہ اس گھٹی کا پوری طرح سے عادی ہوتا ہے تو پھر اسے بطور خام قوت کوئی چالاک اقلیت اپنے مخصوص مقاصد حاصل کرنے کے لیے حسبِ ضرورت و منشا نیم سفاکی و سفاکی کے ساتھ استعمال کرتی ہے۔

آج ہمیں ایسی کوئی سہولت و جانکاری میسر نہیں جو ہمارے غلام پرکھوں کو دستیاب تھی۔ فوٹو: اے ایف پی

اکثریت کو حواس میں نہ آنے دینے کے لیے عظیم ماضی اور سنہرے مستقبل کی فلمیں دکھائی جاتی ہیں اور زمانہِ حال کو نظرانداز کرنے کا سبق رٹایا جاتا رہتا ہے۔ تمام ابلاغی وسائل کام میں لاتے ہوئے روزمرہ بنیادی مسائل کو راستے کی تکلیف اور ایک بڑے مقصد کے لیے قربانی بتایا جاتا ہے اور پھر یہ عظیم مقصد بصورت گاجر قومی، طبقاتی یا گروہی خچر کے آگے لٹکا دیا جاتا ہے تاکہ وہ اس امید پر سواری کا بوجھ اٹھائے چلتا رہے کہ گاجر کبھی تو اس کے دانتوں تک پہنچے گی۔
جب خچر ادھ موا ہوجاتا ہے تو طوطا چشم سواری اسے راہ میں چھوڑ کے کسی اور تازہ مند خچر کے ماتھے پر خوابوں کی وہی گاجر لٹکا دیتی ہے۔ شاباش ۔۔ بس تھوڑی دیر اور۔ اب تو بہت کم فاصلہ باقی ہے۔ ارے یہ سامنے کے دو پہاڑ ہی تو اور چڑھنے ہیں۔ اس کے بعد تو سبزہ ہی سبزہ، پانی ہی پانی، خوشحالی ہی خوشحالی، سکون ہی سکون۔
یہ سواری اور یہ خچر پچھلے تہتر برس سے چلتے چلے جا رہے ہیں اور منزل ہے کہ آنے کا نام ہی نہیں لیتی۔ اب تو یوں لگتا ہے کہ منزل بھی صفر کے ہندسے کی طرح کا کوئی مفروضہ ہے۔ مگر صفر کے بعد کم ازکم ایک تو آتا ہے۔ جبکہ منزل کا خواب خچر کے پاس رہ جاتا ہے اور تعبیر سواری کے ہاتھ آتی ہے۔

کچھ راز نئے آزاد غلاموں پر بھی آشکار نہیں ہو سکتے۔ فوٹو: اے ایف پی

کہتے ہیں غلامی ختم ہوگئی۔ اب ہم سب آزاد ہیں۔ یہ ایک اور گاجر ہے جس سے ہماری تواضع کی جا رہی ہے۔ غلامی تو خیر کیا ختم  ہوتی غلام کا آقا اور چالاک ہو گیا ہے۔
جب دورِ غلامی تھا تو غلام کو کم از کم یہ تو معلوم تھا کہ مالک کون ہے؟ اس نے کتنے میں کس سے خریدا؟ پیر میں جو بیڑیاں ہیں کس دھات کی ہیں؟ کھانے میں زیادہ سے زیادہ کیا ملے گا؟ رہنے کے لیے کٹیا کا سائز کیا ہے؟ مالک کی کس سے دوستی اور کس سے دشمنی ہے اور کس سے مناقفانہ تعلق ہے؟ مالک کس بات پر ناراض اور کس پر خوش ہوتا ہے؟ یہ بھی تو ممکن ہے کہ مالک کسی دن اسے آزاد کر دے، لاولد ہو تو جاتے جاتے کچھ دے ہی جائے، رحم دل ہو تو اولاد کو اچھے سلوک کی وصیت کر جائے اور سفاک ہو تو کسی بھی دن غیض و غضب میں آ کر مار ڈالے اور غلامی کی زندگی سے دائمی نجات دلا دے۔
مگر آج ہمیں ایسی کوئی سہولت و جانکاری میسر نہیں جو ہمارے غلام پرکھوں کو دستیاب تھی۔ کیونکہ ہمیں یقین دلا دیا گیا ہے کہ ہم آزاد ہیں۔ کیونکہ ہمارے پاؤں میں لوہے کی بیڑیاں نہیں، کیونکہ ہم بشرطِ سکت آزادی سے کہیں بھی آ جا سکتے ہیں۔ کیونکہ ہمیں یہ وہم عطا کیا گیا ہے کہ ہم اپنے ذاتی فیصلے خود کر سکتے ہیں حتیٰ کہ اپنے نمائندے اور حکمران بھی خود چن سکتے ہیں۔ گویا ہم اپنی قسمت کے مالک ہیں۔ یہ سب ہمیں اچھے سے ازبر کرا دیا گیا ہے۔

غلامی تو خیر کیا ختم  ہوتی غلام کا آقا اور چالاک ہو گیا ہے۔ فوٹو: اے ایف پی

مگر جیسے کچھ راز پرانے دور کے بیڑی بند غلاموں پر نہیں کھولے جاتے تھے ویسے ہی کچھ راز نئے آزاد غلاموں پر بھی آشکار نہیں ہو سکتے۔ آشکار ہو بھی جائیں تو غلاموں کے کس کام کے۔ پرانی دنیا کی طرح نئے دور  کے آقا بھی غلاموں سے سوچ اور اس سوچ کے نتیجے میں جمع کردہ وسائل کے اعتبار سے دس ہاتھ آگے ہیں۔ نہ ہوتے تو آقا کاہے کو ہوتے۔
کیا کیا نہیں بتایا گیا؟ اور بتایا بھی گیا تو کیا سمجھ میں نہیں آ رہا؟ یعنی یہ کہ سنہ 2019 کا غلام دو ہزار انیس برس پہلے کے غلام کی طرح آہنی زنجیر سے نہیں ریموٹ کنٹرول سے باندھا گیا ہے، اس کے سر پر موٹے کپڑے کا توبڑا نہیں بلکہ ذہین پروپیگنڈے کی دھات سے بنا  ٹوپا چڑھایا گیا ہے۔ اس کے کانوں میں پگھلا  سیسہ نہیں بلکہ سوچنے سمجھنے سے بے بہرہ کر دینے والا شور ڈال دیا گیا ہے۔ اس کی آنکھوں میں گرم سلاخیں نہیں پھیری گئیں بلکہ اسے بصارت کش ٹی وی دے دیا گیا۔ اب وہ کسی کٹیا میں تنہا نہیں بلکہ ایک بہت بڑے پنجرے میں اپنے ہی جیسے کروڑوں کے ساتھ رہ کر خود مختاری کی چرس پی رہا ہے اور راضی ہے۔

اکثریت کو حواس میں نہ آنے دینے کے لیے عظیم ماضی اور سنہرے مستقبل کی فلمیں دکھائی جاتی ہیں۔ فوٹو: اے ایف پی

نہ صرف جسمانی غلامی وائی فائی ہو چکی ہے بلکہ مجھ پر میرا اختیار، تلاشِ انصاف، جان و مال کا تحفظ، میرا آقا، میرے رشتے، میری اجرت، خواب، تعبیر، سوچ، خوشی، دکھ، ڈیپریشن، نفرت، محبت، مسیحائی، موت، سب وائی فائی اور ہاتھ میں تصوراتی آزادی کا لالی پاپ۔
کیا ایسی غلامی سے چھٹکارا ممکن ہے؟ چھٹکارا تب ہی ممکن ہے جب یہ طے ہو جائے کہ اصل میں آقا کون ہے کہ جس کا گریبان پکڑا جا سکے۔ یہاں تو آقا بھی الیوژن ہے، کیا ضمانت کہ جو آقا کا کردار نبھا رہا ہے وہ کوئی اداکار ہی ہو اور  اس کا ڈائریکٹر کوئی اور ہو اور اس ڈائریکٹر کا فنانسر کوئی اور ہو اور اس فنانسر کا بھی کوئی مہا فنانسر ہو۔
 

شیئر:

متعلقہ خبریں