انسداد پولیو مہم کی ڈیوٹی پر مامور دو پولیس اہلکار ہلاک

خیبر پختونخوا کے ضلع لوئر دیر میں پولیس کے مطابق انسداد پولیو ٹیم کی حفاظت پر مامور دو پولیس اہلکار نامعلوم مسلح افراد کی فائرنگ سے ہلاک ہوگئے ہیں۔

ضلع دیر کی مقامی پولیس کے مطابق یہ واقعہ بدھ کی صبح لال قلعہ مرخنی کے قریب اس وقت پیش آیا جب دونوں پولیس اہلکار انسداد پولیو سینٹر ڈیوٹی کے لیے جا رہے تھے۔

لوئر دیر کے ایس ایس پی عارف وزیر نے اردو نیوز سے بات کرتے ہوئے کہا کہ ’ پولیس اہلکار فرمان اور مکرم انسداد پولیو کی ڈیوٹی پر مامور تھے، ان اہلکاروں کو انسداد پولیو سنٹر جاتے ہوئے نشانہ بنایا گیا۔‘

عارف وزیر کا مزید کہنا تھا کہ یہ کہنا قبل از وقت ہو گا کہ آیا یہ واقعہ بھی ماضی کے واقعات جیسا ہے۔  

ان کے مطابق تحقیقات سے معلوم ہوگا کہ کس وجہ سے ان اہلکاروں کو نشانہ بنایا گیا۔

لوئر دیر میں انسداد پولیو مہم سے جڑا یہ ایسا پہلا واقعہ ہے جس میں ٹیم کی حفاظت پر مامور پولیس اہلکاروں کو نشانہ بنایا گیا ہو۔

لوئر دیر کی پولیس کے مطابق اس واقعے سے پولیو مہم متاثر نہیں ہوئی۔

ابھی تک کسی نے اس واقعے کی ذمہ داری قبول نہیں کی۔

انسداد پولیو کی مہم پیر سے ملک کے مختلف علاقوں میں جاری ہے۔

اس مہم کے تحت تقریبا چار کروڑ بچوں کو پولیو کے قطرے پلائے جائیں گے جس کے لیے دو لاکھ 64 ہزار افراد پر مشتمل عملہ تعینات کیا گیا ہے۔

رواں برس پاکستان میں 104 پولیو کے کیسز سامنے آئے جبکہ گذشتہ برس ان کیسز کی تعداد 12 تھی۔

پاکستان میں انسداد پولیو مہم کئی برسوں سے مشکلات کا شکار ہے۔ اس مہم میں کئی پولیس اہلکاروں سمیت خواتین ٹیم ممبرز بھی نشانہ بنی ہیں۔

• واٹس ایپ پر پاکستان کی خبروں کے لیے ’اردو نیوز‘ گروپ جوائن کریں