’جواہر لعل نہرو یونیورسٹی پر حملہ پہلے سے طے تھا‘

انڈیا کا معروف تعلیمی ادارہ جواہر لعل نہرو یونیورسٹی (جے این یو) ایک بار پھر خبروں میں ہے اور اس بار معاملہ انتہائی سنگین نظر آ رہا ہے کیونکہ کیمپس میں 50 سے زیادہ نقاب پوش افراد داخل ہوئے اور انہوں نے طلبہ اور ٹیچرز کو تشدد کا نشانہ بنایا اور ہاسٹل میں توڑ پھوڑ کی۔

جے این یو کے طلبہ پر ہونے والے حملے پر انڈیا کے مختلف گوشوں سے مذمت کی جا رہی ہے جبکہ سوشل میڈیا پر اسے بی جے پی کی ایما پر کیا جانے والا حملہ بتایا جا رہا ہے۔ دوسری جانب لوگ امت شاہ کے استعفے کا مطالبہ بھی کر رہے ہیں۔

خبر رساں ادارے پریس ٹرسٹ آف انڈیا کے مطابق آل انڈیا میڈیکل سائنسز ہسپتال کے حکام نے بتایا ہے کہ پیر کو جے این یو کے 34 طلبہ کو ہسپتال سے چھٹی دے دی گئی۔ انہیں گذشتہ شام ساڑھے پانچ بجے کے بعد ہسپتال میں داخل کیا گیا تھا۔

زخمی ہونے والوں میں جے این یو طلبہ یونین کی صدر آئیشی گھوش بھی ہیں جنہیں سر پر چوٹ آئی ہے اور ان کی ویڈیو بھی وائرل ہوئی ہے۔

جے این یو کے سابق طالب علم اور سٹوڈنٹ یونین کے صدر سیتارام یچوری نے آئیشی گھوش کی ویڈیو کو ٹویٹ کرتے ہوئے لکھا ہے کہ 'اس ویڈیو سے یہ ظاہر ہوتا ہے کہ آر ایس ایس/ بی جے پی انڈیا کو کیا بنانا چاہتے ہیں۔ انہیں کامیاب نہیں ہونے دیا جائے گا۔'

عینی شاہدین کا الزام ہے کہ حملہ آوروں نے کپڑوں سے اپنے منہ چھپا رکھے تھے اور انہوں نے ہاسٹل میں چن چن کر مسلمان طلبہ کے کمروں کو نشانہ بنایا۔

خبر رساں ادارے اے این آئی کے مطابق دلی میں جنوب مغربی علاقے کے نائب پولیس کمیشنر دیویندر آریہ نے کہا ہے نامعلوم افراد کے خلاف ایف آئی آر درج کر لی گئی ہے جبکہ اس سلسلے میں سوشل میڈیا پوسٹ اور سی سی ٹی وی فوٹیج کی بھی جانچ کی جائے گی۔

دوسری جانب جے این یو انتظامیہ نے بیان جاری کرتے ہوئے کہا ہے کہ یکم جنوری سے یونیورسٹی کا سرمائی سیشن شروع ہوا اور اس کے ساتھ طلبہ کے ریجسٹریشن کا معاملہ شروع ہوا لیکن طلبہ کا ایک گروپ ریجسٹریشن کے خلاف تھا اور انہوں نے انٹرنیٹ کو نقصان بھی پہنچایا۔

انتظامیہ کا کہنا ہے کہ پانچ جنوری کو ریجسٹریشن کرانے والے اور انہیں روکنے والوں کے درمیان ہاتھا پائی بھی ہوئی تھی لیکن شام ساڑھے چار بجے کے بعد نقاب پوش افراد پیریار ہوسٹل میں داخل ہوئے اور طلبہ کے کمروں میں گھس کر ان پر ڈنڈے اور راڈ سے حملہ کر دیا۔