کورونا، لاک ڈاؤن: عید کی برینڈڈ کلیکشن خطرے میں

رمضان کے آغاز میں اب چند دن ہی باقی رہ گئے ہیں اور عموعاً رمضان کی آمد سے قبل ہی زیادہ تر لوگ عید کے کپڑے خرید لیتے تھے۔ اسی وجہ سے مختلف ڈیزائنرز کی جانب سے رمضان سے چند ہفتے قبل ہی عید کلیکشن لانچ کر دی جاتی تھی تاہم اس سال حالات مختلف ہیں اور ڈیزائنرز کی عید کولیکشن بھی خطرے میں دکھائی دے رہی ہے جس کی وجہ کورونا وائرس کے باعث ملک میں جاری لاک ڈاؤن ہے۔

پاکستان میں مختلف برینڈز کی جانب سے عید کلیکشن نہ آنے کی ایک وجہ فیکڑیوں کا بند ہونا بتایا گیا ہے اور کہا گیا ہے کہ فیکڑیوں میں کام نہ ہونے کی وجہ سے کپڑوں کی تیاری ممکن نہیں ہے۔

مشہور برینڈ ثنا سفیناز کے ڈائریکٹر الطاف ہاشوانی نے اردو نیوز سے بات کرتے ہوئے کہا کہ اُنھوں نے 14 مارچ سے فیکڑیاں بند کر دی تھیں۔ عام حالات میں اس وقت تک عید کے کپڑے تیار ہو کر دکانوں پر آجاتے تھے، تاہم عید کی کافی کولیکشن ابھی تک تیار ہی نہیں ہوئی۔

'حکومت کی جانب سے اعلان کے بعد بھی پولیس کی جانب سے اُن کو فیکڑیاں کھولنے کی اجازت نہیں دی جا رہی۔ ملازمین کو کام نہ کرنے کے باوجود مارچ کی تخواہیں بھی ادا کر دی ہیں۔'

 اُن کا کہنا ہے کہ 'مگر ہم کب تک ایسا کر سکیں گے کیونکہ دکانوں کے مالکان بھی کرائے کا مطالبہ کر رہے ہیں اور کام بند ہونے کی وجہ سے وہ کہاں سے ادا کریں گے؟'

ان کے بقول 'حکومت سے ٹیکس کم کرنے کا مطالبہ کیا ہے جس پر مثبت جواب ملا ہے۔ دوسری جانب اگر فیکڑیاں کھل بھی جائیں تو دکانیں بند ہوئیں تو کپڑے کس کو بیچیں گے؟'

بہت سے برینڈز ایسے ہیں جن کی لان کولیکشن لانچ کے لیے تیار تھی، تاہم لاک ڈاؤن کی وجہ سے اب وہ فیکڑیوں اور دکانوں پر ہی موجود ہے۔ 

خسارہ کم کرنے کے لیے بے شمار برینڈز نے سیل بھی لگا دی ہے۔ اس پر الطاف ہاشوانی نے کہا کہ 'اُن کو آن لائن بیچنے کی اجازت بھی نہیں مل رہی حالانکہ ان کے برینڈ کے پاس آن لائن آڈرز موجود ہیں، تاہم کوریئر کمپنیوں کو صرف ضروری اشیا کی ڈیلیوری کی اجازت ہے۔'

دوسری جانب عام عوام بھی اب حالات بہتر ہونے کی امید کر رہے ہیں۔ وہ رمضان سے قبل اور رمضان کے دوران عید کی تیاریوں کے لیے بازاروں کے چکر لگاتے تھے مگر اب یہ کب تک ممکن ہوگا کوئی نہیں بتا سکتا۔

 ایک اور مشہور برینڈ بونینزا سترنگی کے سی ای او حنیف بیلوانی نے بتایا کہ 'حکومت سے بات چیت جاری ہے اور امید ہے کہ رمضان میں حکومت اجازت دے دی گی جس کے بعد ہم فیکڑیاں اور دکانیں کھول سکیں گے۔'

اُردو نیوز سے بات کرتے ہوئے حنیف بیلوانی نے کہا کہ 'مارچ میں اُن کے برینڈ کی تین کلیکشنز آئی تھیں جس میں سے ایک مارچ میں سیل ہو گئی تھی جبکہ دوسری 60 ساٹھ فیصد سیل ہوئی۔'

' گذشتہ دس روز سے آئن لائن سیل کی اجازت ملی ہے اور وہاں سیل 15 فیصد سے بھی کم ہے۔اگر حکومت رمضان میں کاروبار کھولنے کی اجازت دے دے تو اب بھی عید کی کولیکشن تیار کر لیں گے۔'

یہاں سوال یہ پیدا ہوتا ہے کہ کیا درزیوں کے پاس کام زیادہ ہونے کی وجہ سے ریڈی میڈ کپڑوں کی مانگ میں اضافہ ہو جائے گا؟ اس پر حنیف بیلوامی نے کہا کہ 'چھوٹے علاقوں میں کپڑوں کی فٹنگ کے مسئلے کی وجہ سے ریڈی میڈ کپڑوں کی سیل زیادہ اچھی نہیں ہوتی، اس لیے ان سلے کپڑے ہی زیادہ استعمال ہوتے ہیں کیونکہ ہر دوسرے گھر میں کسی نہ کسی کو کپڑوں کی سلائی کرنا آتی ہے۔'

خیال رہے کہ حکومت کی جانب سے چودہ اپریل کو کئی شعبوں کو کھولنے کی اجازت دی گئی تھی تاہم اب بھی کئی جگہوں پر فیکڑیاں بند ہیں۔دوسری جانب کئی ڈیزائنرز نے کورونا وائرس کے خلاف لڑنے والے ڈاکٹرز اور طبی عملے کے لیے حفاظتی لباس بھی تیار کرنا شروع کیا ہے۔