کورونا کی وبا سے نمٹنے کے لیے نئی ایپ

سعودی عرب میں اب ایپ  کے ذریعے گھر بیٹھے فارمیسیوں میں ماسک اور سینیٹائزر کی دستیابی اور ادویات کے نرخ معلوم کیے جا سکیں گے.

سعودی فوڈ اینڈ ڈرگ اتھارٹی (ایس ایف ڈی اے) نے کورونا کی وبا سے نمٹنے کے لیے نئی ایپ (طمنی) کا اعلان کیا ہے.

  اس کی بدولت سعودی شہری اورمقیم غیرملکی فارمیسیوں میں ماسک اور سینیٹائزر کی دستیابی کا معلوم کر سکتے ہیں.

یہ بھی  پتہ کرسکتے ہیں کہ ماسک یا سینیٹائزر کس فارمیسی میں کتنی قیمت پر دستیاب ہے. ادویہ کے نرخ بھی اس ایپ کے ذریعے معلوم کیے جاسکتے ہیں.

سعودی خبررساں ادارے ایس پی اے کے مطابق نئی ایپ سعودی ایف ڈی اے  کے ماتحت ہے. اس کی بدولت صارفین دوا کے نام یا بارکوڈ کی مدد سے طبی آلات، کھانے پینے  کی اشیا اور ادویہ کے بارے میں اہم معلومات حاصل کرسکیں گے.

اس کے ذریعے صارفین کو اہم اور معتبر ترین معلومات مہیا ہوں گی.

 یہ بھی معلوم ہوسکے گا کہ دوا مارکیٹ میں ہے یا نہیں.  دواؤں اور خوراک کے بارے میں شکایات بھی درج کرائی جاسکیں گی. 

طمنی ایپ سے صارفین کو دوائیں خریدنے سے پہلے  ایک ہی مرض کی مختلف دواؤں اور ا ن کے نرخوں کے بارے میں بھی معلومات حاصل کی جاسکتی ہیں-

 صارف یہ  بھی معلوم کرسکے گا کہ اس کی مطلوبہ دوائیں یاطبی آلات کس فارمیسی میں کس جگہ موجود ہیں.

 کسی بھی متعینہ دوا اور اس کے مہیا نہ ہونے کی صورت میں اس جیسی کسی اور دوا کے بارے میں بھی معلومات حاصل کی جا سکے گی.

طمنی ایپ کے ذریعے یہ بھی پتہ لگایاجاسکتا ہے کہ صارف کی رہائش یا دفتر کے قریب کونسی فارمیسی ہے جہاں سینیٹائزر، ماسک اور دستانے موجود ہیں.

یاد رہے کہ سعودی ایف ڈی اے نے سعودی عرب بھر میں ایک ہزِار سے زیادہ فارمیسیوں کو طمی ایپ سے جوڑ دیا ہے.

• واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں