’رام مندر کی تعمیر اور تحریک میں شامل لوگوں کا شکریہ‘

انڈیا کی معروف گلوکارہ لتا منگیشکر جہاں اپنی آواز کے جادو کے لیے جانی جاتی ہیں وہیں وہ مذہبی عقیدت کے لیے بھی گاہے بگاہے سرخیوں میں آتی رہتی ہیں۔

پانچ اگست کو ایودھیا میں تاریخی رام مندر کی تعمیر کے لیے بھومی پوجن یعنی زمین کی پوجا کی گئی۔ اس موقع پر سروں کی ملکہ کہی جانے والی لتا منگیشکر نے اپنی خوشی کا اظہار کیا۔

لیکن سوشل میڈیا پر بہت سے لوگوں کو ان کی جانب سے بیان پسند نہیں آیا کیونکہ بہت سے لوگ انہیں مذہب و ملت کی دیوار سے اوپر ہو کر دیکھتے ہیں۔

لتا منگیشکر نے ٹوئٹر کے طویل ورژن کا سہارا لیتے ہوئے ایک مفصل ٹویٹ کیا جس میں انہوں نے رام مندر کی تعمیر اور اس کی تحریک میں شامل لوگوں کا شکریہ ادا کیا ہے۔

انہوں نے لکھا ’نمسکار: کئی راجاؤں، کئی نسلوں اور پوری دنیا کے رام بھکتوں کا کئی صدیوں سے نامکمل خواب آج پورا ہو رہا ہے۔ کئی سالوں کی جلاوطنی کے بعد، آج ایودھیا میں بھگوان شری رام کا مندر دوبارہ تعمیر کیا جارہا ہے، بنیاد ڈالی جا رہی ہے۔ اس کا بہت بڑا سہرا محترم ایل کے اڈوانی جی کو جاتا ہے کیونکہ انہوں  نے رتھ یاترا کرکے اس مسئلے پر عوامی شعور کو بیدار کیا تھا، اور اس کا سہرا محترم بالاصاحب ٹھاکرے جی کو بھی جاتا ہے۔‘

انہوں نے مزید لکھا ’آج سنگ بنیاد کے لیے بڑی تقریب ہو رہی ہے۔ اس میں معزز وزیراعظم شری نریندر مودی جی، آر ایس ایس سرسنگھ چالک (سربراہ) محترم موہن بھاگوت جی، اترپردیش کی گورنر محترمہ آنندی بین پٹیل جی اور رام جنم بھومی نیاس کے صدر نرتیہ گوپال داس جی، اترپردیش کے وزیراعلیٰ یوگی آدتیہ ناتھ جی اور متعدد ممتاز شخصیات شریک ہوں گی۔‘

ان کے مطابق آج اگرچہ کورونا کی وجہ سے لاکھوں عقیدت مند وہاں نہیں پہنچ پائیں گے لیکن ان کا ذہن اور توجہ شری رام کے پاؤں پر ہی ہوگی۔ ’مجھے خوشی ہے کہ یہ تقریب محترم نریندر بھائی کے ہاتھوں انجام دی جا رہی ہے۔ آج میں، میرا خاندان اور پوری دنیا بہت خوش ہے، گویا کہ آج ہر سانس کہہ رہی ہے، جے شری رام۔‘

ان کے اس بیان کو جہاں سیاسی سمجھا جا رہا ہے وہیں یہ بھی کہا جا رہا ہے کہ پہلے کسی راجہ مہاراجہ نے اس جانب دھیان نہیں دیا۔

لتا منگیشکر نے اس کا سہرا تقریبا پورے سنگھ پریوار کو دیا ہے اور مہاراشٹر کی پارٹی شیو سینا کے بانی بالا صاحب ٹھاکرے کو دیا ہے جن کے بیٹے ادھو ٹھاکرے ابھی مہاراشٹر میں وزیراعلیٰ ہیں۔ لتا منگیشکر کو انڈیا کا سب سے بڑا شہری ایوارڈ بھارت رتن واجپئی کی حکومت کے درمیان دیا گیا تھا اور وہ شیو سینا کے بہت قریب رہی ہیں۔

ایک ٹوئٹر صارف ہری سنگھ یادو نے لکھا: ’لتا جی آپ ہمارے لیے محترم ہیں لیکن ملک کی کسی دیسی ریاست نے رام مندر کی تعمیر کی کوشش نہیں کی۔ اس معاملے کو آنجہانی راجیوگاندھی ہی سامنے لائے تھے ورنہ آر ایس ایس اور بی جے پی نے اس سے پہلے کوئی معاملہ اٹھایا ہی نہیں تھا۔‘

کئی صارف نے لکھا کہ انہیں مندر مسجد سے لینا دینا نہیں ملک میں امن چاہیے۔ جبکہ بڑی تعداد میں صارف لتا منگیشکر کے سر میں سر ملاتے ہوئے نظر آ رہے ہیں اور اپنی خوشی کا اظہار کر رہے ہیں۔

ایک صارف نے لکھا کہ سیاست جاری ہے مندر کی مخالفت کرنے والے اقبال انصاری کو بلایا گیا لیکن بی جے پی بالا صاحب کو بھول گئی۔

انہوں نے مزید کہا کہ یہ رام مندر ہم سب کا ہے صرف بی جے پی کا نہیں۔ جبکہ ایک شخص نے لکھا کہ اس کی ساری آمدن صرف برہمنوں کو جائے گی۔