بابر اعظم دنیا کے پانچویں بہترین بلے باز قرار

پاکستانی سٹار بیٹسمین بابر اعظم نے ایک مرتبہ پھر انٹرنیشنل کرکٹ کونسل (آئی سی سی) کی ٹیسٹ رینکنگ میں پانچویں پوزیشن حاصل کر لی ہے۔

آئی سی سی نے انگلینڈ بمقابلہ پاکستان ٹیسٹ میچز کے بعد منگل کے روز دس بہترین بیٹسمین پر مشتمل نئی ٹیسٹ رینکنگ کی فہرست جاری کی ہے۔

آئی سی سی کی جانب سے جاری کی گئی نئی رینکنگ کے مطابق پاکستانی سٹار بلے باز اور ٹی ٹوئنٹی ٹیم کے سابق کپتان بابر اعظم کا شمار دنیا کے پانچ بہترین بلے بازوں میں ہوتا ہے۔ انگلینڈ کے خلاف ٹیسٹ بیٹنگ میں بابر اعظم نے 798 پوائنٹس بنا کر پانچویں پوزیشن حاصل کی ہے۔

اس سے قبل رواں سال فروری میں بابر اعظم نے بنگلہ دیش کے خلاف ٹیسٹ کرکٹ میں 800 پوائنٹس بنا کر آئی سی سی کی رینکنگ میں پانچویں پوزیشن حاصل کی تھی جو انہوں نے انگلینڈ کے ساتھ ٹیسٹ میچز کے بعد ایک مرتبہ پھر حاصل کر لی ہے۔

بنگلہ دیش کے خلاف ٹیسٹ کرکٹ میں حاصل کیے جانے والے 800 پوائنٹس ان کے کیریئر میں اب تک کی بہترین ریٹنگ ہے۔

آئی سی سی کی دس بہترین بلے بازوں کی رینکنگ فہرست کے مطابق آسٹریلیا کے سٹیو سمتھ 911 پوائنٹس حاصل کر کے پہلے نمبر پر ہیں، انڈیا کے وراٹ کوہلی 886 پوائنٹس کے ساتھ دوسرے نمبر پر، آسٹریلوی مارنس لابوشین 827 پوائنٹس کے ساتھ تیسرے نمبر پر، جبکہ نیوزی لینڈ کے ولیم سن 812 پوائنٹس حاصل کر کے چوتھے نمبر پر ہیں۔