عمان کے قریب مال بردار بحری جہاز پر حملہ، انڈین ملاح ہلاک

عمان کے قریب انڈیا کے پرچم بردار ایک مال بردار بحری جہاز کو ’نامعلوم فضائی آبجیکٹ‘ نے نشانہ بنایا ہے جس کے نتیجے میں ایک انڈین شہری ہلاک ہو گیا۔

فرانسیسی خبر رساں ادارے اے ایف پی کے مطابق نئی دہلی نے واقعے کی تصدیق کی ہے۔

انڈیا کے وزیر برائے جہاز رانی سربانند سونووال کا کہنا ہے کہ ایم ایس وی الجسیفی پر انڈیا سے تعلق رکھنے والے 14 سٹاف ارکان سوار تھے۔

انہوں نے سوشل میڈیا پر جاری کیے گئے ایک بیان میں کہا کہ واقعے کے بعد عمانی کوسٹ گارڈ نے 13 افراد کو بچا لیا اور باہر نکالا تاہم گجرات سے تعلق رکھنے والے ایک ملاح زخموں کی تاب نہ لاتے ہوئے چل بسے، ان کا نام گندھار ناہم اجیج بتایا گیا ہے۔

انڈین وزرات جہاز رانی کے مطابق ان کا ملک دنیا بھر میں تجارتی جہازوں کے لیے عملہ فراہم کرنے والے بڑے ممالک میں شامل ہے اور 2025 میں اس شعبے میں تین لاکھ 20 ہزار سے زائد ملاح کام کر رہے تھے۔

28 فروری کو ایران پر امریکہ اور اسرائیل کے حملوں کے ساتھ شروع ہونے والی جنگ میں آبنائے ہرمز میں ہونے والے حملوں میں انڈیا کے کئی ملاح ہلاک ہو چکے ہیں۔

انڈین وزارت خارجہ نے تجارتی جہازوں پر حملوں کی بارہا مذمت کرتے ہوئے مطالبہ کیا ہے کہ بین الاقوامی سمندری حدود میں جہازوں کی محفوظ اور بلا رکاوٹ آمدورفت یقینی بنائی جائے۔