'پشاور کے شہری میرے آبائی گھر کی تصاویر شیئر کریں'

انڈین لیجنڈ اداکار دلیپ کمار نے سماجی رابطے کی ویب سائٹ ٹوئٹر کے ذریعے پشاور کے شہریوں سے درخواست کی ہے کہ وہ ان کے آبائی گھر کی تصاویر شیئر کریں۔

خیال رہے کہ پشاور کے اندرون شہر میں مشہور انڈین اداکاروں کے آبائی گھر اب بھی موجود ہیں۔

اردو نیوز سے وابستہ صحافی شیراز حسن نے دلیپ کمار کے گھر کی تصاویر ٹوئٹر پر شیئر کی تھیں جس کو انہوں نے ری ٹویٹ کیا اور ساتھ میں ہیش ٹیگ پشاور اور ہیش ٹیگ دلیپ کمار استعمال کرتے ہوئے لکھا کہ ان کے ساتھ ان کے آبائی گھر کی تصاویر شیئر کی جائیں۔

محمد اسلام خان مہمند نامی ایک صارف نے بھی دلیپ کمار کے ساتھ ان کے گھر کی تصاویر شیئر کیں۔

دلیپ کمار اور راج کپور کے گھروں کو ان کے مالکان مسمار کر کے اس زمین پر کمرشل پلازہ بنانا چاہ رہے تھے تاہم اب ان کو ثقافتی ورثے اور سیاحتی مرکز بنانے کے لیے کام شروع کیا گیا ہے۔

اردو نیوز سے بات کرتے ہوئے خیبر پختونخوا کے محکمہ آرکیالوجی اور میوزیم کے ڈائریکٹر عبدالصمد خان نے بتایا تھا کہ اس وقت ان کے محکمے نے مداخلت کر کے گھروں کے گرائے جانے کو رکوایا تھا، لیکن گھروں کو تب کسی حد تک نقصان پہنچ چکا تھا۔

ان کا کہنا تھا کہ اب مسمار ہونے سے بچانے کے بعد اگلا مرحلا یہ ہے کہ خیبر پختونخوا کی حکومت ان گھروں کو خرید کر ان کی مرمت کا کام کرے تاکہ انہیں مخفوظ کیا جا سکے، کیونکہ ان گھروں کا شمار ملک کے ثقافتی ورثے میں ہوتا ہے۔

’اس کے لیے محکمے نے پشاور کے ڈپٹی کمشنر کو خط لکھے ہیں تاکہ صوبائی حکومت گھروں کی ملکیت حاصل کر سکے۔‘

عبدالصمد کا کہنا تھا کہ حکومت گھروں کی ملکیت لینڈ ایکوزیشن ایکٹ 1984 کے سیکشن 4 کے تحت حاصل کرے گی۔

اس کے علاوہ دلیپ کمار کا 100 سال پرانا گھر بھی پشاور شہر کی تاریخ کا حصہ ہے۔ وہ آٹھ سال کی عمر میں ممبئی چلے گئے تھے۔