جلال آباد:پاکستانی قونصل خانے کے باہربھگدڑ سے 11خواتین ہلاک

افغانستان کے شہر جلال آباد میں پاکستانی قونصل خانے کے قریب بھگدڑ سے 11 خواتین ہلاک ہوگئی ہیں۔

خبررساں ادارے اے ایف پی کے مطابق پاکستانی قونصل خانے کے قریب سٹیڈیم میں ہزاروں افراد ویزے کی درخواست دینے کے لیے جمع ہوئے تھے۔

ننگرہار کے صوبائی دارالحکومت جلال آباد کے سٹیڈیم میں جمع افراد جب وہاں سے نکلنے کی کوشش کر رہے تھے تو بھگدڑ  مچی اور کئی افراد کچلے گئے۔

مقامی  ہسپتال کے ترجمان ظاہر عادل نے کہا ہے کہ واقعے میں آٹھ خواتین سمیت دس افراد زخمی بھی ہوئے ہیں۔

سکیورٹی حکام نے بھی اس واقعے کی تصدیق کی ہے۔

پاکستانی قونصل خانے نے سات مہینے کے وقفے کے بعد ایک ہفتہ پہلے ویزے کے اجرا کا سلسلہ شروع کیا تھا۔

صوبہ ننگرہار اور اس کے قریبی صوبوں سے لوگ ویزے کے لیے اپلائی کرنے کے لیے صبح سویرے جمع ہوئے تھے۔