جلد کو خشک ہونے سے کیسے بچائیں؟

بہت سے مرد موسم سرما میں اپنی جلد کی حفاظت کرنے میں ناکام رہتے ہیں جس سے جلد کی خشکی، چہرے کا پھٹنا اور دیگر مسائل جنم لیتے ہیں، اس کا خواتین کے مقابلے میں مردوں کو زیادہ سامنا ہوتا ہے کیونکہ مردوں کو شدید سردی اور گرمی دونوں موسموں میں کام کرنے کی مجبوری درپیش ہوتی ہے۔

اس کے ساتھ ساتھ بہت سے ایسے مشروبات اور کھانوں کی وجہ سے بھی جلد خشک ہوجاتی ہے، اور سردی کے موسم میں اس میں اور اضافہ ہوجاتا ہے۔

جلد کو خشک کرنے والی خوراک

سعودی جریدے الرجل کے مطابق جلد کو خشک کرنے والے اشیا میں کافی کا شمار سرفہرست ہوتا ہے یہ انسانی خلیوں سے رطوبت کھینچتی ہے جس کی وجہ سے جلد خشک ہوجاتی ہے۔

اس کے علاوہ زیادہ نمکین کھانے بھی جسم کے خلیوں سے رطوبت کھینچتے ہیں اور یہی حال مقدار سے زیادہ میٹھی چیزوں کا ہے۔

جن اشیا میں چینی کا زیادہ استعمال کیا جاتا ہے وہ جلد کےلیے نقصان دہ ثابت ہوتی ہیں جلد کی تازگی اور لچک ختم ہوجاتی ہے، ان کھانوں میں سفید چاول، روٹی وغیرہ بھی شامل ہیں۔

ماہرین غذا وٹامن اے سے بھرپور اشیا موسم سرما میں کم کھانے کی ترغیب دیتے ہیں، ان میں دودھ ، انڈے کی زردی وغیرہ بھی شامل ہیں۔ اس سے ہونٹ پھٹ جاتے ہیں اور جلد کی خشکی میں اضافہ ہوتا ہے۔