Sorry, you need to enable JavaScript to visit this website.

پی آئی اے کا مینیو تبدیل، سعودی عرب جانےوالوں کے مزے

اندرون ملک پروازوں میں صرف ڈبے میں پیک شدہ ٹھنڈے مشروبات پیش کیے جائیں گے (فوٹو: ٹوئٹر)
پاکستان کی قومی ایئر لائن پی آئی اے نے کورونا وائرس کی دوسری لہر سے نمٹنے کے لیے نئے اقدامات متعارف کراتے ہوئے اندرون ملک پروازوں کے دوران کھانے کی فراہمی بند جبکہ بیرون ملک پروازوں کے مینیو میں تبدیلی کر دی ہے۔
ایئر لائن نے مسافروں کو چائے اور کافی پیش کرنے پر بھی پابندی عائد کر دی ہے۔
صرف سعودی عرب جانے والی پروازوں میں اسنیکس، کلب سینڈوچز، چکن پیٹیز، ایک کیلا اور مفن پییش کیا جائے گا جبکہ دیگر پروازوں میں ہلکی پھلکی ریفریشمنٹ دی جائے گی۔

 

پی آئی اے کے ترجمان عبداللہ حفیظ خان نے اردو نیوز کو بتایا کہ تمام پروازوں کے دوران گرم مشروبات پیش کرنے پر پابندی ہوگی اور مسافروں کو پرواز میں پہلے سے بند ٹھنڈے مشروبات پیش کیے جائیں گے۔
اندرون ملک پروازوں میں صرف ڈبے میں پیک شدہ ٹھنڈے مشروبات پیش کیے جائیں گے جبکہ بین الاقوامی پروازوں میں بھی کھانے کے مینیو میں تبدیلی کا اطلاق فوری کردیا گیا ہے۔
ترجمان کے مطابق پی آئی اے کے چیف ایگزیکٹو ارشد ملک نے کھانے میں تبدیلی کی منظوری بھی دے دی ہے۔ ان اقدامات کا مقصد مسافروں اورعملے کے ارکان کے درمیان رابطے کو محدود اور کم کرنا ہے۔
ترجمان پی آئی اے  کے مطابق قومی ایئرلائن نے سعودی عرب سیکٹر کے لیے اسنیکس، کلب سینڈوچز، چکن پیٹیز، ایک کیلا اور مفن پیش کرنے جبکہ کافی یا چائے پیش نہ کرنے کا فیصلہ کیا ہے۔
کابل اور دیگر خلیجی ممالک کی پروازوں میں صرف ہلکی پھلکی غذائیں یعنی اسنیکس پیش کیے جائیں گے۔ سعودی سیکٹر سے واپسی کی پرواز پر کلب سینڈوچز، چکن پیٹیز، ایک کیلا اور بسکٹ پیش کیے جائیں گے۔

شیئر: