Sorry, you need to enable JavaScript to visit this website.

ڈاکٹروں نے نواز شریف کو پیزا کھانے سے منع تو نہیں کیا: مریم نواز

مریم نواز کا کہنا تھا کہ وہ شو آف ہینڈز کے خلاف نہیں مگر اس وقت اس کے پیچھے شفافیت نہیں ہے (فوٹو: اے ایف پی)
مسلم لیگ ن کی نائب صدر مریم نواز نے کہا ہے کہ پی ڈی ایم کے استعفوں کے بعد حکومت 500 نشستوں پر ضمنی الیکشنز نہیں کرا سکتی کیونکہ ’ہم چوڑیاں پہن کر گھروں میں نہیں بیٹھیں گے۔‘
جمعرات کو لاہور میں نیوز کانفرنس کرتے ہوئے مریم نواز کا کہنا تھا کہ وزیراعظم سینیٹ انتخابات وقت سے پہلے کروا کے بھی اپنی حکومت نہیں بچا سکتے۔ اس فیصلے کے پیچھے ان کا خوف ہے۔

 

حکومت کی جانب سے سینیٹ الیکشنز شو آف ہینڈز  کے ذریعے کرانے کے حوالے سے مریم نواز کا کہنا تھا کہ وہ شو آف ہینڈز کے خلاف نہیں مگر اس وقت اس کے پیچھے شفافیت نہیں ہے۔
انہوں نے چیئرمین سینیٹ کے خلاف عدم اعتماد کی تحریک کا حوالہ دیتے ہوئے کہا کہ اس وقت حکومت کو شو آف ہینڈ کیوں یاد نہیں آیا؟
’اس وقت اپوزیشن ارکان کو توڑنے کے لیے ریاستی طاقت کا استعمال کیا گیا اور اب خود کمزور ہوئے تو شو آف ہینڈ یاد آ گیا۔‘
ان کا کہنا تھا کہ جب عوامی قہر جاگ اٹھتا ہے تو اس قسم کے ہتھکنڈے کارگر ثابت نہیں ہوتے۔
بقول ان کے حکومت کے پاس دن کم رہ گئے ہیں جو بھی کر لے، اسے جانا تو پڑے گا اور جلدی جانا پڑے گا۔
انہوں نے وزیراعظم عمران خان کے اس بیان کہ ’پی ڈی ایم کے جلسوں سے فرق نہیں پڑتا‘ کے حوالے سے کہا کہ اگر واقعی ایسا ہی ہے تو ایسی کیا ایمرجنسی ہو گئی ہے کہ ایک ماہ قبل سینیٹ انتخابات کا اعلان کرنا پڑا ’پاکستان کی 73 سالہ تاریخ میں ایسا نہیں ہوا۔‘

مریم نواز نے صحافی سے دریافت کیا کہ کیا ’آپ کو نواز شریف کے صحت مند نظر آنے پر اعتراض ہے؟ (فوٹو: اے ایف پی)

مریم نواز نے لاہور جلسے کے روز وزیراعظم عمران خان کی کتوں کے ساتھ تصویروں کا حوالہ دیتے ہوئے یہ بھی کہا کہ اس میں وہ کتوں کو نہیں خود کو بہلا رہے تھے کیونکہ وہ تحریک سے پریشان ہیں۔
’کتوں کے ساتھ کھیلنا اور بات ہے لیکن اداروں کے ساتھ کھیلنا خطرناک ہے، اس کی قیمت آپ کو ادا کرنا پڑے گی جو آپ سے قوم لے گی‘
انہوں نے وزیراعظم کو مخاطب کرتے ہوئے کہا کہ پہلے آپ فوج کے ترجمان بنے رہے، پھر ایف آئی اے کے سربراہ بن بنے، پھر خفیہ اداروں کا کام بھی خود کرنے لگے اور اب الیکشن کمیشن کے چیئرمین بھی بن بیٹھے ہیں۔
مریم نواز نے کہا کہ انتخابات کے فیصلے الیکشن کمیشن نے کرنا ہوتے ہیں آئین کے تحت وزیراعظم ایسا نہیں کر سکتا۔

مریم نواز نے کہا کہ انتخابات کے فیصلے الیکشن کمیشن نے کرنا ہوتے ہیں وزیراعظم ایسا نہیں کر سکتا (فوٹو: پی ایم آفس)

نواز شریف کی تصویر جس میں وہ صحت مند نظر آرہے اور پیزا کھا رہے ہیں کے بارے میں پوچھے گئے سوال پر انہوں نے صحافی سے پوچھا کہ آپ کو ان کے صحت مند نظر آنے پر اعتراض ہے؟
ساتھ ہی کہا کہ وہ پیزا کیوں نہیں کھا سکتے؟
تاہم صحافی کی جانب سے مزید نکات پر ان کا کہنا تھا کہ مجھے کوئی ایسا ڈاکٹر دکھا دیں جو کہے کہ دل کا مریض کبھی کبھار پیزا نہیں کھا سکتا۔
اس کے بعد ایک صحافی نے پاپا جونز کا ذکر بھی کیا جس پر مریم نواز نے کہا کہ ’میرا بھی یہی خیال ہے۔‘

شیئر: