کویت، ڈرون کی مدد سے قیدیوں تک منشیات پہنچانے کی کوشش

کویت کی سیکیورٹی فورسز نے انکشاف کیا ہے کہ حال ہی میں سینٹرل جیل کے احاطے سے ایک چھوٹا ڈرون پکڑا ہے جس کی مدد سے جیل میں منشیات پہنچانے کی کوشش کی گئی تھی۔ پولیس نے واقعہ کی تحقیقات شروع کردی ہیں۔سینٹرل جیل کے حکام کے مطابق حال ہی میں انہیں جیل کے قریب ایک عجیب سی آواز سنائی دی۔ حکام نے اس کا پتہ لگانے کی کوشش کی تو معلوم ہوا کہ جیل کے دوسرے اور تیسرے بلاک کے درمیان ایک بغیر پائلٹ چھوٹا ڈرون اترا ہے۔اس ڈرون کے ساتھ مضبوط دھاگوں سے ایک برتن باندھا گیا تھا جس کے اندر پلاسٹک کے 3 تھیلوں میں سفید رنگ کی مشکوک نوعیت کی منشیات رکھی گئی تھی۔ پولیس نے منشیات اور ڈرون قبضے میں لینے کے بعد تحقیقات شروع کردی ہیں۔ یہ معلوم نہیں ہوسکا کہ آیا اس ڈرون کو کون کہاں سے کنٹرول کررہا تھا اور یہ منشیات کس کےلئے بھجوائی گئی تھیں۔