اوورسیز پاکستانیوں کی بھیجی گئی رقوم میں ریکارڈ اضافہ، سعودی عرب والے آگے

بیرون ملک مقیم پاکستانیوں نے مسلسل چھ ماہ تک دو ارب ڈالر سے زائد ترسیلات بھیج کر نیا ریکارڈ قائم کر دیا۔

سعودی عرب میں مقیم پاکستانی ترسیلات زر بھیجنے والوں میں سب سے آگے جبکہ متحدہ عرب امارات میں رہنے وال پاکستانی دوسرے نمبر پر رہے۔

سٹیٹ بینک آف پاکستان کی ترسیلات زر سے متعلق ماہانہ رپورٹ میں بتایا گیا کہ گزشتہ ماہ یعنی دسمبر 2020 میں بیرون ملک مقیم پاکستانیوں نے دو ارب 40 کروڑ ڈالر ترسیلات بھیجیں۔ یہ مسلسل چھٹا مہینہ ہے کہ ترسیلات زر کی مجموعی تعداد دو ارب ڈالر ماہانہ سے زائد رہی۔

بیرون ملک مقیم مالی سال 2020-21 کے پہلے چھ ماہ میں مجموعی طور پر 14 ارب 20 کروڑ ڈالر سے زائد ترسیلات بھیجے۔ سال 2019 میں اسی عرصہ میں ترسیلات زر 11 ارب 37 کروڑ تھی۔  

سٹیٹ بینک کے مطابق ان چھ ماہ میں خلیجی ممالک میں مقیم پاکستانیوں نے ایک ارب 61 کروڑ ڈال پاکستان بھیجے۔ جن میں سے  سعودی عرب سے تین ارب 95 کروڑ ڈالر پاکستان بھیجے گئے۔

دسمبر 2020 میں بھی سعودی عرب سے چھ کروڑ 24 لاکھ ڈالر جب کہ متحدہ عرب امارات سے پانچ کروڑ 11 لاکھ ڈالر پاکستان بھیجے گئے۔ دسمبر 2019  کے مقابلے میں اس اضافے کی شرح بالترتیب 24 اور 18 فیصد رہا۔

اس کے علاوہ برطانیہ سے آنے والے ترسیلات زر 3 کروڑ 24 لاکھ، امریکہ دو کروڑ تین لاکھ اور یورپی ممالک دو کروڑ 46 لاکھ ڈالر رہے۔

وزیر اعظم عمران خان نے ریکارڈ ترسیلات زر بھیجنے پر بیرون ملک پاکستانیوں کا شکریہ ادا کیا ہے۔ اپنے ٹویٹ میں وزیر اعظم نے کہا کہ '‏ترسیلاتِ زر کےحوالے سےایک اور ریکارڈ شکن مہینے (دسمبر: 2.4 ارب $) پر میں اپنےسمندر پار پاکستانیوں کامشکور ہوں۔ ماشاءاللہ پہلی مرتبہ پاکستان کی ترسیلات مسلسل 6 ماہ تک 2 ارب ڈالر سے زیادہ رہیں۔ رواں مالی سال کےان 6 ماہ کی ترسیلات کامجموعی حجم 14.2 ارب $ رہاجوگزشتہ برس سے24.9% زیادہ ہے۔‘