شاعر مشرق کا مجسمہ، ’اقبال کی روح کانپ گئی ہوگی‘

لاہور کے گلشن اقبال پارک میں پاکستان کے قومی شاعر علامہ محمد اقبال کا مجسمہ لگایا گیا جس کی تصاویر سوشل میڈیا پر وائرل ہو گئی ہیں۔
علامہ اقبال کے مجسمے کی حالت دیکھ کر سوشل میڈیا پر سینکڑوں صارفین نے مایوسی اور افسوس کا اظہار کیا جبکہ کئی افراد نے علامہ اقبال کے مجسمے کو ان کی توہین قرار دیا۔
مائیکرو بلاگنگ ویب سائٹ پر علامہ اقبال کے مجسمے کی تصاویر شیئر کرتے ہوئے سوشل میڈیا صارفین حکومت سے سوال کر رہے ہیں کہ کیا واقعی یہ شاعر مشرق کا ہی مجسمہ ہے؟

سینیئر صحافی حامد میر نے ٹویٹ میں علامہ اقبال کے پوتے کو مخاطب کرتے ہوئے لکھا کہ ’جناب ولید اقبال صاحب کیا آپ جانتے ہیں یہ کس کا مجسمہ ہے؟ کیا یہ کہیں سے بھی شاعر مشرق کا مجسمہ نظر آتا ہے؟ آپ کی حکومت کے خیال میں یہ شاعر مشرق ہیں اور کسی سفارشی سے مجسمہ بنوا کر عوام الناس کے لیے اسے گلشن اقبال لاہور میں سجا دیا گیا۔ مجھے تو یہ مجسمہ دیکھ کر بہت افسوس ہوا ہے۔‘

کچھ سوشل میڈیا صارفین کا خیال تھا کہ نئے پاکستان میں علامہ اقبال کو بھی سزا دی گئی ہے۔ ٹوئٹر ہینڈل ڈیفنڈر نے علامہ اقبال کے مجسمے کی تصویر دیکھ کر تبصرہ کیا کہ ’آج تو علامہ اقبال کی روح بھی کانپ گئی ہوگی۔‘
علامہ اقبال کے مجسمے پر بحث کے دوران گفتگو آگے بڑھی تو کچھ سوشل میڈیا صارفین نے مجسمے میں علامہ اقبال کی درست شباہت نظر نہ آنے کو آرٹ سے دوری کا نتیجہ قرار دیا۔ صارف سُر سپارلے نے لکھا کہ ’جب ریاست اختلافی آوازوں کو دبانے کی وجہ سے سوشل سائنس کو نظر انداز کرے گی تو پھر آرٹ کے حوالے سے اس طرح کی افسوسناک صورتحال پیش آتی ہے۔‘

بعض سوشل میڈیا صارفین طنز ومزاح بھی کرتے نظر آئے۔ مجسمے کو دیکھ کر تبصرہ کرنے والے صارفین اس بات کی شکایت بھی کرتے رہے کہ علامہ اقبال کے ہاتھ اور مونچھیں کہاں لگا دی گئی ہیں۔ خالد ایم نامی ٹوئٹر ہینڈل سے لکھا گیا کہ ’معذرت کے ساتھ، یہ علامہ اقبال سے زیادہ موہن جو دڑو کے کسی مجسمے سے مماثلت رکھتا ہے۔‘
کئی سوشل میڈیا صارفین نے مجسمے کی حالت کو پاکستان کی تبدیلی سے جوڑا اور کہا کہ نئے پاکستان میں علامہ اقبال بھی تبدیل کر دیے گئے۔
ٹوئٹر صارف عبدالسلام نے علامہ اقبال کی تصویر شئیر کرتے ہوئے طنز کیا کہ ’نواز شریف کے دور میں کرپشن کی وجہ سے علامہ اقبال ایسے دِکھتے تھے۔ عمران خان کی تبدیلی کی وجہ سے اب حقیقی علامہ اقبال ایسے دِکھتے ہیں۔ نواز شریف نے علامہ اقبال مصنوعی والا بنا دیا تھا جبکہ ہم نے حقیقی۔‘

گلشن اقبال پارک میں لگائے گئے مجسمے کے حوالے سے ترجمان پارکس اینڈ ہارٹیکلچر لاہور نادیہ طفیل نے اردو نیوز کو بتایا کہ یہ مجسمہ مالیوں نے اپنی مدد آپ کے تحت بنایا۔ اب کسی پروفیشنل کی خدمات لے کر اسے ٹھیک کروایا جائے گا۔

چیئرمین پارکس اینڈ ہارٹیکلچر لاہور نے کہا ہے کہ ’مالیوں نے اپنے طور پر اپنے ذاتی پیسوں سے بنایا ہے صرف محبت میں، ھم اس پر مالیوں کے خلاف ایکشن تو نہیں لے رہے البتہ اس کو ٹھیک کریں گے اور آئندہ کیلے ہدایات جاری کر دی ہیں کی بغیر اجازت ایسا کوئی کام نہ کیا جائے۔‘