میزائل کا ملبہ گرنے سے متاثر ہونے والے مکان کی تصاویر جاری

محکمہ شہری دفاع نے کہا ہے کہ ریاض پر داغے جانے والے حوثی میزائل کاملبہ گرنے سے ایک مکان جزوی طور پر متاثر ہوا ہے۔

سعودی پریس ایجنسی کے مطابق ریاض ریجن میں محکمہ شہری دفاع کے ترجمان لیفٹیننٹ محمد الحمادی نے کہا ہے کہ ’ہفتہ اور اتوار کی درمیانی شب حوثی ملیشیا نے ریاض شہر کو نشانہ بنانے کے لیے جو میزائل داغا تھا اور جسے سعودی فضائیہ نے ناکارہ بنادیا ہے، اس کا ملبہ متعدد محلوں کی شہری آبادی پر گرا ہے‘۔

’شہری دفاع کی ٹیمیں تباہ شدہ میزائل کا ملبہ جمع کر رہی ہیں تاہم ایک مکان ملبہ گرنے سے متاثر ہوا ہے‘۔

ترجمان نے کہا ہے کہ ’حوثی میزائل کے ملبے سے ہونے والا نقصان مالی ہے، اس کے باعث کوئی جانی نقصان نہیں ہوا‘۔

’محکمہ شہری دفاع نے واقعے پر انتہائی مہارت اور طے شدہ ضوابط کے مطابق معاملہ کیا ہے‘۔