نہرِ سویز مکمل طور پر بحال، تمام بحری جہاز اپنی منزل کی جانب روانہ

نہر سویز میں پھنسے بحری جہاز ایورگِون کو نکالے جانے کے بعد اس کے دونوں اطراف رکے ہوئے تمام جہاز اپنی منزل کی جانب روانہ ہو چکے ہیں۔

برطانوی خبر رساں ادارے روئٹرز کے مطابق سویز کنال اتھارٹی کے حکام کا کہنا ہے کہ راستہ بند ہونے کی وجہ پھنسنے والے 422 جہازوں میں سے آخری 61 جہاز اہم تجارتی راستے سے سنیچر کو گزرے۔

واضح رہے کہ دو سمندروں کو ملانے والی دنیا کی اہم بحری گزرگاہ نہر سویز 23 مارچ کو اس وقت بند ہو گئی تھی جب 400 میٹر لمبا بحری جہاز ایورگوِن اس میں ترچھا کھڑا ہو کر پھنس گیا تھا جس کو چھ دن کی کوشش کے بعد واپس گہرے پانی میں لا کر نہر سے نکالا گیا۔

ایک ہفتے تک نہر سویز بند رہنے سے اس کے دونوں اطراف بحری جہازوں کی ٹریفک جام ہو گئی تھی اور 422 مال بردار جہاز بحیرہ روم اور بحیرہ احمر میں راستہ کھلنے کے انتظار میں کھڑے تھے۔ حکام کے مطابق ’کُل 85 جہازوں کو سنیچر کو نہر سویز سے گزرنا تھا جن میں سے 24 راستہ کھلنے کے بعد آئے تھے۔‘

سویز کنال اتھارٹی کے چیئرمین اسامہ ربیع نے جمعے کو رات گئے ایم بی سی ٹی وی سے بات کرتے ہوئے کہا تھا کہ ایورگِون جہاز کے پھنسنے کی وجہ جاننے کے لیے بدھ کو تحقیقات کا آغاز کیا گیا تھا۔ ’تحقیقات جاری ہیں اور دو روز کے بعد ہم نتیجے کا اعلان کریں گے۔‘

خیال رہے کہ اس جہاز نے بحیرہ احمر اور بحیرہ روم کے درمیان ہر قسم کی بحری ٹریفک کو بلاک کر دیا تھا اور جہاز پھنسنے کے باعث تجارتی مال کی ترسیل میں اربوں ڈالر کا نقصان ہوا تھا۔