’کھانا بانٹیں، گندگی نہ پھیلائیں‘ مارگلہ کی پہاڑیوں سے برطانوی سفیر کا پیغام

جہاں دنیا کو ماحولیاتی آلودگی سے خطرہ لاحق ہے وہیں کوڑا کرکٹ اس آلودگی کو بڑھانے میں اہم کردار ادا کر رہا ہے۔

اسلام آباد کے پہاڑ اور اس کے ٹریلز سیاحوں کی توجہ کا مرکز ہوتے ہیں، سیاح اکثر شام کو ان پہاڑیوں کی جانب آتے ہیں لیکن  بد قسمتی سے یہاں بھی جگہ جگہ کین اور پلاسٹک بیگز پڑے نظر آئیں گے۔

برطانیہ کے سفیر کرسچن ٹرنر نے اپنے ٹوئٹر اکاؤنٹ سے ایک تصویر شیئر کی ہے جس میں وہ اسلام آباد کو صاف رکھنے کی تاکید کر رہے ہیں۔

انہوں نے لکھا کہ ’کھانا بانٹنے کے لیے ہوتا ہے نہ کہ گندگی پھیلانے کے لیے، کوڑے کے دو بیگز مارگلہ سے اکھٹے کیے، براہ کرم خوبصورت اسلام آباد کو صاف رکھنے میں مدد کریں۔‘

برطانوی سفیر کی ٹویٹ کے بعد کئی صارفین نے ماحول کو صاف رکھنے کے حوالے سے ٹویٹ کیے۔

 ٹوئٹر صارف ظفر زیدی نامی صارف نے لکھا کہ ’پڑھے لکھے جاہل یہ حرکت کریں تو پھر اللہ ہی حافظ ہے۔‘

صارفین جہاں صفائی کا درس دیتے دکھائی دئے وہیں کچھ صارفین اسلام آباد کی مقامی انتظامیہ کو اس مسئلے کی طرف متوجہ کرتے ہوئے نظر آئے۔

صارف بابر علی شاہ نے لکھا کہ ’اسلام آباد کی انتظامیہ کے لیے صفائی سب سے اہم ہونی چاہیے، دارالحکومت کی ہریالی کے لیے یہ تباہ کن ہے۔‘

برطانوی سفیر کی ٹویٹ پر گفتگو آگے بڑھی تو صارفین ان کے اس عمل کو سراہتے نظر آئے اور دلچسپ تبصرے کیے۔

ٹوئٹر ہینڈل جنید جاوید  لکھتے ہیں کہ ’پھر ہم پاکستانی کہتے ہیں کہ گورے پاکستان کے خلاف سازش کرتے ہیں۔‘
 

گفتگو آگے بڑھی تو بہت سے صارفین برطانوی سفیر کا شکریہ ادا کرتے رہے جبکہ کچھ صارفین کا کہنا تھا کہ ایسے خوبصورت مقامات پر گند پھیلانے والوں پر حکومت کی جانب سے بھاری جرمانے عائد ہونے چاہیے۔

صارف محمد زاہد نے لکھا کہ حکومت کیوں جرمانہ عائد نہیں کرتی۔

صارفین ایک دوسرے کو تلقین کرتے رہیں کہ پاکستان کی سیاحتی اور قدرتی خوبصورتی سے مالا مال مقامات کو صاف رکھنا چاہیے تاکہ ملک میں سیاحت کے شعبے کو فروغ ملے۔