کرپٹو سیکٹر کو ہدف بنانے کیلئے دبئی میں دوسرا فری زون  

دبئی میں مختلف اشیا کا مرکز( ڈی ایم سی سی) کرپٹو سیکٹر کو ہدف بنانے والا امارات کا دوسرا فری زون بن گیا ہے۔

امارات کی نیوز ایجنسی وام کے مطابق اس مرکز نے کرپٹوگرافک اور بلاکچین سیکٹروں میں کام کرنے والے کاروباری اداروں کے لئے ڈی ایم سی سی کرپٹو سینٹر کا آغاز کیا ہے۔

یہ اقدام دبئی ایئرپورٹ فری زون اتھارٹی(ڈی اے ایف زیڈ اے)کی جانب سے جاری کردہ اس بیان کے کچھ ہی دن بعد کیا گیا ہے جس میں کہا گیا تھا کہ فری زون اتھارٹی نے کرپٹو اثاثوں کی تجارت کے لئے ریگولیٹر منظوری حاصل کرلی ہے۔

وام نیوز ایجنسی کے جاری کردہ ایک بیان میں ڈی ایم سی سی نے کہا ہے کہ دبئی کے الماس ٹاور میں واقع  ڈی ایم سی سی کرپٹو سینٹر کرپٹو اور بلاک چین ٹیکنالوجیز کے اطلاق اور ان کی ترقی کا مرکز بننے کے لئے تیار ہے۔

ڈی ایم سی سی کے سی ای او احمد بن سلیم نے کہا کہ کرپٹو اور بلاکچین ٹیکنالوجیز میں عالمی تجارت اور سپلائی چین کو تبدیل کرنے کی بے پناہ صلاحیت موجود ہے۔

یہ تجارت کے مستقبل کو آگے بڑھانے کے لئے  ڈی ایم سی سی وژن سے کامل ہم آہنگی رکھتا ہے اور یہ ڈی ایم سی سی کرپٹو سینٹر کے آغازکے پس پردہ کلیدی محرکات میں سے ایک ہے۔

ڈی ایم سی سی نے کہا ہے کہ اس مرکز  میں سی وی لیبز  کی زیرقیادت کرپٹو ایڈوائزری پریکٹس بھی موجود ہوگی۔

یہ وہی انسٹی ٹیوشن ہے جو سوئس حکومت کی حمایت یافتہ کرپٹو ویلی کے پس پشت کارفرما ہے اور جو اس سے قبل کارڈنو اور ایتھریرم جیسے کرپٹو رہنما پیدا کر چکا ہے۔

امارات میں حکومت کی جانب سے معیشت کے کچھ شعبوں میں مکمل غیر ملکی ملکیت کو قانونی حیثیت دینے کے اقدام کا مطلب یہ ہے کہ اب کچھ آزاد زونز اپنے کاروباری ماڈلز تبدیل کرنے پر غور کر رہے ہیں۔