امریکہ ہماری آنکھوں کے سامنے تباہ ہو رہا ہے، ٹرمپ کی بائیڈن پر تنقید

سابق امریکی صدر ڈونلڈ ٹرمپ نے امریکی صدارتی انتخابات کے کئی مہینوں کے بعد اپنی پہلی تقریر میں آئندہ برس ہونے والے وسط مدتی الیکشن کو ’امریکہ کی بقا کی جنگ‘ قرار دیا ہے۔

فرانسیسی خبر رساں ایجنسی اے ایف پی کے مطابق سنیچر کو اپنی تقریر میں ڈونلڈ ٹرمپ نے صدر جو بائیڈن پر تنقید کرتے ہوئے کہا ہے کہ ’امریکہ ہماری آنکھوں کے سامنے تباہ ہو رہا ہے۔‘

ان کا کہنا تھا کہ ’امریکہ کی بقا کا انحصار رپبلیکنز کو ہر سطح پر جتوانے پر منحصر ہے جس کا آغاز اگلے سال مڈ ٹرم الیکشن سے ہوگا۔ ہمیں یہ کرنا ہوگا۔ ہمارے پاس کوئی اور آپشن نہیں ہے۔ ہم اپنی آزادی کا دفاع کرنے جا رہے ہیں۔‘

امریکی ریاست نارتھ کیرولینا میں 12 سو کے لگ بھگ افراد سے خطاب میں ڈونلڈ ٹرمپ میں پہلے والا جوش و جذبہ نہیں تھا۔

تقریر میں ٹرمپ نے اپنے پسندیدہ اہداف جو بائیڈن کی بارڈر پالیسی، چین اور ڈیموکریٹس پر زبانی حملے کیے جس پر لوگوں نے پرجوش ردعمل دکھایا۔

تاہم جب انہوں نے کورونا کی وبا پر قابو پانے اور ویکسین بنانے کی بات کی تو لوگ خاموش رہے۔

ٹرمپ نے فیس بک کی طرف سے ان کا اکاؤنٹ دو برس تک بند رکھنے کے اعلان کو رد کرتے ہوئے کہا کہ ’یہ نا انصافی ہے کہ میرا اکاؤنٹ دو برس تک بند رہے گا۔‘

انہوں نے ایک بار پھر صدراتی الیکشن کو ’فراڈ‘ قرار دیتے ہوئے کہا کہ ’ڈیموکریٹس اور میڈیا کی کرپشن کی اس سے بڑی کوئی مثال نہیں ہو سکتی۔‘

’اگر آپ سمھجتے ہیں کہ لوگ نہیں جانتے تو میں بتاؤں کہ لوگ سب جانتے ہیں۔‘

ڈونلڈ ٹرمپ نے اگلے صدارتی انتخابات میں حصہ لینے کا تو کہا لیکن اس حوالے سے ان کی طرف سے کوئی حتمی اعلان نہیں کیا گیا۔