بابر اعظم اور وراٹ کوہلی کو ایک ہی وقت ایکشن میں دیکھنا ’سپیشل ٹریٹ‘

پاکستانی ٹیم ویسٹ انڈیز کے خلاف ٹیسٹ میچ کھیل رہی ہے جب کہ انڈین ٹیم طویل دورانیے کی کرکٹ میں انگلینڈ کے مقابل ہے۔ ایسے میں شائقین کرکٹ جہاں کھیل سے لطف اندوز ہو رہے ہیں وہیں دنیائے کرکٹ کے دو بہترین بلے بازوں بابر اعظم اور وراٹ کوہلی کو بیک وقت ایکشن میں دیکھ کر اسے مزید انجوائے بھی کر رہے ہیں۔

کرکٹ میچوں کے دوران سوشل میڈیا پر عموما میچ سے متعلق ٹرینڈ میں کھیلنے والی دونوں ٹیموں اور ان کے کھلاڑیوں کی کارکردگی، ریکارڈز اور ان سے توقعات کا ذکر کیا جاتا ہے، تاہم ایک ہی وقت میں ہونے والے پاکستان بمقابلہ ویسٹ انڈیز اور انڈیا بمقابلہ انگلینڈ کے میچوں میں بابر اعظم اور وراٹ کوہلی کے ذکر نے باقی پہلوؤں کو گہنا سا دیا ہے۔

دونوں کھلاڑیوں کا ذکر کرنے والے ان کے کیریئر ریکارڈز کا حوالہ دیتے ہوئے باہم موازنہ بھی کر رہے ہیں۔

یہ پہلا موقع نہیں کہ کرکٹ کو پسند کرنے والے بابر اعظم اور وراٹ کوہلی کے ریکارڈز کو کمپیئر کر رہے ہیں، پاکستان اور انڈیا کی کرکٹ ٹیمیں جب بھی گراؤنڈ میں اترتی ہیں، پاکستانی اور انڈین شائقین دونوں کرکٹرز کی کارکردگی سے متعلق یادیں تازہ کرنے کی پسندیدہ مشق بھی شروع کر دیتے ہیں۔

اس مرتبہ بھی ٹائم لائنز پر کچھ ایسا ہی منظر ہے جہاں شائقین کرکٹ اپنے پسندیدہ بلے بازوں کی نئی و پرانی تصاویر اور ویڈیوز شیئر کرتے ہوئے انہیں سراہ رہے ہیں، کچھ ایسے بھی ہیں جو منتظر ہیں کہ دونوں میں سے کون بہتر کارکردگی کا مظاہرہ کرے گا۔ 

بابر اعظم اور وراٹ کوہلی کا ذکر آئے تو بہت زیادہ ڈسکس ہونے والے پہلوؤں میں ایک ’کور ڈرائیو‘ بھی ہوتا ہے۔ انڈین شائقین وراٹ کوہلی کو جب کہ پاکستانی شائقین کرکٹ بابر اعظم کو سب سے اچھی کور شاٹ کھیلنے والا بتاتے ہیں۔ مختلف ٹویپس کے دوران اس موضوع پر گفتگو اس وقت مزید دلچسپ ہو جاتی ہے جب کوئی ادارہ یا کسی ٹیم کے سوشل اکاؤنٹس کی جانب سے بھی یہی بات کی جائے۔

انڈین پریمیئر لیگ کی ٹیم رائل چیلنجرز بنگلور نے ’کور ڈرائیو‘ کو سوال بنایا اور دونوں کھلاڑیوں کا نام لیے بغیر پوچھا کہ ’دنیا میں کس کی کور ڈرائیو سب سے اچھی ہے؟‘۔

آئی پی ایل فرنچائز کی ٹویٹ پبلک ہوتے ہی شائقین کی اکثریت کسی بھی دوسرے کھلاڑی کا ذکر کیے بغیر بابر اعظم اور وراٹ کوہلی کی تصاویر اور ویڈیوز کے ذریعے اپنے اپنے پسندیدہ کھلاڑی کا سب سے بہتر قرار دلوانے کی جدوجہد میں مصروف دکھائی دی۔

بابر اعظم اور وراٹ کوہلی کے ساتھ پاکستان اور انڈین ٹیموں کی موجودہ غیرملکی دوروں کے دوران کارکردگی پر بات شروع ہوئی تو انگلینڈ اور ویسٹ انڈیز میں ہونے والے میچوں کے پہلے دن کا کھیل اور اس کے مختلف پہلو بھی ٹائم لائنز کی زینت بنے۔

بابر اعظم اور وراٹ کوہلی کی بیٹنگ کو ’ایشین فینز کے لیے ٹریٹ‘ قرار دیا گیا تو منفرد بیٹنگ سٹائل کے حامل پاکستانی کھلاڑی فواد عالم، ویسٹ انڈین اننگز کی ابتدائی دونوں وکٹیں لینے والے محمد عباس بھی پاکستانی شائقین کی خصوصی دلچسپی کا مرکز رہے۔

پاکستان اور ویسٹ انڈیز کی ٹیمیں جمیکا کے گراؤنڈ میں مدمقابل ہیں جب کہ انڈیا اور انگلینڈ لارڈز میں آمنے سامنے ہیں۔

پاکستانی ٹیم نے اپنی پہلی اننگز میں 217 رنز کا مجموعہ ترتیب دیا۔ فواد عالم کی نصف سنچری، فہیم اشرف کے 44۔ بابر اعظم کے 30 اور محمد رضوان کے 23 رنز کے علاوہ کوئی اور بلے باز خاطرخواہ کارکردگی نہ دکھا سکا۔

پاکستان اور ویسٹ انڈیز کے درمیان 12 اور 17 اگست کے دوران کھیلے جانے والے پہلے ٹیسٹ میچ کے پہلے روز کا کھیل ختم ہوا تو میزبان ویسٹ انڈیز کی ٹیم دو رنز بنا کر دو وکٹیں کھو چکی تھی۔

ویسٹ انڈیز اور پاکستان کے درمیان ٹیسٹ چیمپئن شپ 2021.2023 کے سلسلے کا دوسرا میچ 20 تا 25 اگست تک کھیلا جائے گا۔