جب انڈین سفارت کار نے اینکر کو باہر کا راستہ دکھا دیا، ویڈیو وائرل

انڈین میڈیا سے وابستہ اینکرز اکثر سوشل میڈیا پر طنز و تنقید کا نشانہ بننے کے ساتھ ساتھ مزاح کا سامان بھی پیدا کرتے رہتے ہیں۔

ابھی کچھ ہفتے پہلے ایک انڈین ٹی وی چینل ویڈیو گیم کی ایک فوٹیج اپنی سکرین پر یہ بتاتے ہوئے چلا رہا تھا کہ دیکھیں کیسے پاکستانی جہاز افغانستان کے صوبے پنجشیر میں طالبان  کی مدد کر رہا ہے اور مزاحمت کرنے والوں پر حملے کر رہا ہے۔

یہ مذاق ختم ہوا تو ریپبلک ٹی وی کے اینکرپرسن ارنب گوسوامی نے کابل میں سیرینا ہوٹل کے دو کے بجائے پانچ فلورز بھی بنا ڈالے۔ جن کا وجود ہی نہ تھا۔

موصوف اپنے پروگرام میں پاکستانی مہمان سے کہنے لگے کہ کابل میں سیرینا ہوٹل کے پانچویں فلور پر پاکستان آرمی کے افسران ٹھہرے ہوئے ہیں۔

اس پر پاکستان مہمان نے انہیں مطلع کیا کہ سرینا ہوٹل کے دو سے زائد فلورز تو ہیں ہی نہیں۔

اب سوشل میڈیا پر ایک اور انڈین خاتون اینکر کا بڑا چرچا ہے جو انڈین وزیراعظم نریندر مودی کے دورہ امریکا کے موقع پر وہاں موجود تھیں۔

اقوام متحدہ میں انڈین مشن کی رکن سنیہا دوبے نے اسمبلی میں تقریر کی اور اس کے کچھ ہی دیر بعد ’آج تک ٹی وی‘ کی اینکر انجنا اوم کیشیپ بغیر دستک ان کے کمرے میں گھس گئیں۔

سوشل میڈیا پر وائرل ایک ویڈیو میں دیکھا جا سکتا ہے کہ انڈین اینکر کمرے میں گھستے ہوئے کہتی ہیں کہ ’ہمارے ساتھ سنیہا دوبے یہاں پر موجود ہیں، سنہیا دوبے وہی ادھیکاری ہیں، فرسٹ سیکرٹری، جنہیں پورے دیش نے اتنے گِرو کے ساتھ سنا ہے۔‘

’مجھے پتا ہے آپ آن ریکارڈ بات نہیں کرنا چاہیں گی۔ مگر آج پورا ہندوستان آپ کو سننا چاہ رہا ہے۔‘

سنیہا دوبے نے کہا ’نو کامنٹس، ہمیں جو بولنا تھا ہم لوگوں نے وہ بول دیا، پلیز‘ اور انڈین اینکر کو واپسی کے لیے دروازہ دکھا دیا۔

ان کی یہ ویڈیو ٹوئٹر پر طنز و مزاح کے رنگ بکھیرتی ہوئی نظر آرہی ہے۔

اشیش نامی ٹوئٹر صارف نے دو تصاویر اپنی ٹویٹ میں لگائیں جن میں سے ایک میں وزیراعظم مودی انجنا اوم کیشیپ کے آگے ہاتھ جوڑتے ہوئے نظر آرہے ہیں اور دوسری تصویر میں سنیہا دوبے ان کو باہر کا راستہ دکھاتے ہوئے نظر آرہی ہیں۔

اشیش کا خیال ہے کہ انجنا کو جس طرح سنیہا نے ٹریٹ کیا وہ بلکل درست تھا۔

اور کچھ ٹوئٹر صارف تو انڈین اینکر کی ’بے عزتی‘ پر محظوظ ہوتے ہوئے نظر آرہے ہیں۔

سر کاظم جیوی نامی ٹوئٹر صارف کو لگتا ہے کہ سنہیا دوبے کی جانب سے انڈین اینکر کو شرمندہ کرنا ایک ایسے منصوبے کا حصہ تھا جس کا مقصد انڈین وزیراعظم نریندر مودی کو انجنا سے بہتر دکھانا تھا۔

ٹوئیٹ کے اختتام پر انہوں نے لکھا ’ماسٹر اسٹروک۔‘